Pend-nesihetler 31:1-19

¹Töwendikiler, padishah Lemuelge uning anisi arqiliq wehiy bilen kelgen sözlerdur; anisi bu sözlerni uninggha ögetken:

²I oghlum, i méning amriqim, qesemler bilen tiligen arzuluqum, men sanga néme dey?

³Küch-quwwitingni ayal-xotunlar teripige serp qilmighin; Yaki padishahlarnimu weyran qilidighan ishlargha bérilgüchi bolma!  

⁴I Lemuel, sharab ichish padishahlargha layiq emes, Emirlergimu haraqqa xumar bolush yarashmas.

⁵Bolmisa ular sharab ichip, muqeddes belgilimilerni untup, Bozek bendilerning heqqini astin-üstün qiliwétishi mumkin.

⁶Küchlük haraq ölgüsi kelgenlerge, hesretke chömgenlerge bérilsun!

⁷Ular sharabni ichip, miskinlikini untup, Qaytidin derd-elimini ésige keltürmisun!

⁸Özliri üchün gep qilalmaydighanlargha aghzingni achqin, Halak bolay dégenlerning dewaside gep qil.

⁹Süküt qilma, ular üchün lilla höküm qil, Ézilgenlerning we miskinlerning derdige derman bol.

¹⁰|א| Peziletlik ayalni kim tapalaydu? Uning qimmiti leel-yaqutlardinmu zor éship chüshidu.  

¹¹|ב| Érining köngli uninggha tayinip xatirjem turidu, U bolghachqa érining alghan oljisi kem emestur!

¹²|ג| U ömür boyi érige wapadar bolup yaxshiliq qilidu, Uni ziyan'gha uchratmaydu.

¹³|ד| U qoy yungi we kendir tépip, Öz qoli bilen jan dep ejir qilidu.

¹⁴|ה| U soda kémilirige oxshash, Ailini béqishtiki ozuq-tülüklerni yiraq jaylardin toshuydu.

¹⁵|ו| Tang yorumasta u ornidin turidu, Ailisidikilerge yémeklik teyyarlaydu, Xizmetkar-dédeklerge nésiwisini teqsim qilidu.

¹⁶|ז| U bir parche étizni özi körüp alidu; Qoli bilen yighqan daramettin u bir üzümzar bina qilidu.

¹⁷|ח| Ishqa qarap u bélini küch bilen baghlar, Bileklirini küchlendürer;

¹⁸|ט| Öz ishining paydiliqliqigha közi yéter, Kéchiche chirighini öchürmey ish qilar.

¹⁹|י| U qolliri bilen chaqni chörer, Barmaqliri yip urchuqini tutar.