Pend-nesihetler 14:1-29

¹Herbir dana ayal öz ailisini awat qilar; Exmeq ayal ailisini öz qoli bilen weyran qilar.

²Durusluq yolida mangidighan kishi Perwerdigardin qorqar; Qingghir yolda mangghan kishi Xudani közge ilmas.

³Exmeqning tekebbur aghzi özige tayaq bolar; Aqilanining lewliri özini qoghdar.

⁴Ulagh bolmisa, éghil pak-pakiz turar; Biraq öküzning küchi bolghandila sanggha ashliq tolar.

⁵Ishenchlik guwahchi yalghan éytmas; Saxta guwahchi yalghan gepni nepestek tinar.

⁶Hakawurlar danaliq izdep tapalmas; Biraq yorutulghan ademge bilim élish asan'gha chüsher.

⁷Birawning aghzida bilim yoqluqini bilip yetkende, Uningdin özüngni néri tart.

⁸Eqil-parasetlik kishining danaliqi öz yolini oylinishtidur; Exmeqlerning eqilsizliki bolsa özlirining aldinishidur.

⁹Exmeqler bolsa «itaetsizlik qurbanliqi»ni közge ilmaydu, Heqqaniylar arisida bolsa iltipat tépilar.

¹⁰Köngüldiki derdni peqet özila kötüreler; Köngüldiki xushluqqimu bashqilar shérik bolalmas.

¹¹Yamanning öyi örülüp chüsher; Heqqaniy ademning chédiri güllinip kéter.

¹²Adem balisigha toghridek körünidighan bir yol bar, Lékin aqiwiti halaketke baridighan yollardur.

¹³Oyun-külke bolsa qelbtiki ghem-qayghuni yapar, Xushalliq ötüp ketkende, ghem-qayghu yenila qalar.

¹⁴Toghra yoldin burulup yan'ghan adem haman öz yolidin toyar; Yaxshi adem öz ishidin qanaetliner.

¹⁵Saddilar hemme gepke ishinip kéter; Lékin pem-parasetlik kishi herbir qedemni awaylap basar.

¹⁶Dana adem éhtiyatchan bolup awarichiliktin néri kéter; Exmeq hakawurluq qilip, özige ishinip aldigha mangar.

¹⁷Térikkek exmeqliq qilar; Neyrengwaz adem nepretke uchrar.

¹⁸Saddilar exmeqliqqa warisliq qilar; Pem-parasetlikler bilimni öz taji qilar.

¹⁹Yamanlar yaxshilarning aldida igiler; Qebihler heqqaniyning derwaziliri aldida bash urar.

²⁰Namrat kishi hetta öz yéqinighimu yaman körüner. Bayning dosti bolsa köptur.

²¹Yéqinini pes körgen gunahkardur; Lékin miskinlerge rehim qilghan beriket tapar.

²²Yamanliq oylighanlar yoldin adashqanlardin emesmu? Biraq yaxshiliq oylighanlar rehim-shepqet, heqiqet-sadiqliqqa muyesser bolar.

²³Hemme méhnettin payda chiqar; Biraq quruq paranglar ademni mohtajliqta qaldurar.

²⁴Aqilaniler üchün bayliqlar bir tajdur; Exmeqlerning nadanliqidin peqet yene shu nadanliqla chiqar.

²⁵Heqqaniy guwahliq bergüchi kishilerning hayatini qutquzar; Yalghan-yawidaq sözleydighan guwahchi yalghan gepni nepestek tinar.

²⁶Perwerdigardin qorqidighanning küchlük yölenchüki bar, Uning balilirimu himayige ige bolar.

²⁷Perwerdigardin qorqush hayatning buliqidur; U kishini ejellik tuzaqlardin qutquzar.  

²⁸Padishahning shan-sheripi puqrasining köplikidindur; Puqrasining kemliki emirning halakitidur.

²⁹Éghir-bésiq kishi intayin aqil kishidur; Chéchilghaq exmeqliqni ulughlar.