Pas misnare wok 2:13-24

¹³Bat ol nadalot bin meke pan baut dem klostuman blo Zizas. Dempla bin spik, ‘No! Dempla spak. Dempla bin dringk obamak.’

¹⁴Bat Pita bin stanap tugeda wea dem leben misnareman ane em bin tok wea laud bois po dem pipol, ‘Yupla i ol Zuwisbala blo mi ane ebriwan uda stap wea Zarusalem lisen. Lisen po mi wanem ai go spik po yupla. Den yupla ken sabe wanem i bin apen.

¹⁵Yupla tingk dempla spak a? Bat i no tru, bikoz diswan i nain aklok moningtaim.

¹⁶Wanem yupla luk i apen ya dis moning, da prapa bipotaim spesilmesizman blo God, Zoel, i bin raitem wea Baibol. Em bin raitem diskain:

¹⁷“God bin spik wanem em go mekem wea dem lasdei. Em bin spik, ‘Ai go sane Spirit blo mi po yupla ebriwan. Den ol boi ane ol gel blo yupla go spik da mesiz blo mi po ebribodi. Ai go spik dem yangpipol wea bizin ane ai go soe dem oulpipol wea drim.

¹⁸Wea dem dei, ai go sane Spirit blo mi po ebri man ane oman uda wok po mi, ane dempla go spik mesiz blo mi po ebriwan.

¹⁹Ai go soe nadakain dedliting wea skai, ane ai go soe ol sain wea ert. I go gad blad ane paia ane nadakain big blaiksmok.

²⁰Da san go kam blaik ane mun go kam red wase blad bipo da prapa nadakain gud dei blo da AntapGod i go kam.

²¹Bat ebriwan uda go kole neim blo da AntapGod, i gobi seib.’”

²²‘Pipol blo Izrael, yupla lisen nau. God bin sane Zizas blo Nazaret ane em bin meke dem mirikal, ol spesil gudsamting ane gudsain po soe yumpla God i wok tru em.

²³God bin laue yupla po kese Zizas ane tugeda wea dem nugudpipol, yupla bin neile em wea da kros po kile em. Diswan bin dat longtaim plan blo God.

²⁴Bat God bin lete em pri prom da paua blo ded ane em bin mekem laipgen. Bikoz ded nogad no paua po kip em, em mas kamlaipgen.