Pakeke 2:4-25

⁴God Ioni Riringa i vual a or omole omole nge ma o ri nge keiong rel relnga ako God Ioni Riringa i pavelpolpot i a owo.

⁵Na Juda pelie ako o voth a Jerusalem ako or ini toko lotuongare ako o es a pen epee elonga me.

⁶Ma o nongpol ur aken ma toko pulua o vus me. Ma o kukuk, eneke o nongpol toko lemioongare ako o ri nge okei omole omole.

⁷Ma olemi ngo pelekpol, ma o ria ve, “Ken i vava? Ako tokokoe areke o ri nge keiong rel relnga na or ini Galili angare oenga.

⁸I vova ake te nongpol or ako o ri nge keir omole omole ranga ve ako titemerre na ar ninaere o ri nge, e?

⁹Eneke it ine Partia, Midia na Elam angare na areko ole a Mesopotemia, Judia na Kapadosia na areko ole a Pontus na Esia.

¹⁰Na ar pelie ako ini a Prigia, Pampilia na Isip, na pelie ako a epee a Libia ako toth a Sairini na pelie ini loomere ako o es a Rom me.

¹¹Na it toko Judare na toko relnga pelie ako te lotu tomo nge Judare ole lotuong. Na pelie ako o es a epee a Krit na Arebia me. Ma it vusnga te nongpol or ako o ri nge keir omole omole nge omaing aolonga ako God i oma i.”

¹²Ma o kukuk nge ma olemi ngo senu avele. Ma o ninu nina pel ve, “Ur ake mirenga vava?”

¹³Aveto toko pelie ako o kelelal or ma o ri ve “Ken, ava areke o thin thei engenga ma otheki vaisis.”

¹⁴Pita i mit tomo nge ithanga or mule pa omole pothoi omole. Na i pres na i ritet nge toko na sengre ve, “Thomu Judare na thomu toko elonga ako o voth a Jerusalem, o ta telngomu e lek riong mo lomumu mire nge ur aken.

¹⁵Thomu o ri ve va toko areke o thin thei engenga, aveto avele. Nang meta rongan i el inga limpenel rulpo.

¹⁶Aveto God ile riong elnga nomenganga ina Joel i ritet nomenga nge ur ake i velpol ma i ri ve,

¹⁷“‘God i ri vene: Toth nge nang patopalalnga aro tho paru Onik Riringa a toko na sengre nge. Mo aro tutumuere o ripot lek riong. Na lomu kulpopoere aro o thopol pathengaling rel relnga. Na lomu toloklokere aro o thopol oni theongre.

¹⁸Naro tho paru Onik Riringa a lek toko na seng omaingare nge, mo aro o ripot lek riong nge nang areken.

¹⁹Aro tho oma pakukukaling pelie a sepsa na pathepolong a ulue na mla na won sesenga na won klunga aolonga aro o velpol.

²⁰Nang theki aro i eksingu mo ia mideng naro ngov i eksingu mo i selele ranga ve ini mla. Panen aro Toko Pomnga ile nang i velpol. Na ile nang aken i aolonga rintet na ini nang ako ini pakukukonga.

²¹Naro toko na seng areko o avav a Toko Pomnga iion, aro God i pamimi or.’ “Na i velpol ranga ve ako God ile riong elnga nomenganga a Joel, i ritet nge.

²²Jisas ako ini Nasareta ini toko ako God i patheng i a thomu nge, ma i papomnga i nge ako i oma paatealing na pathepolong na pakukukaling nge imeni ako ru a thomu nge, ako ranga ve lomumu mire nge lale.

²³Na God i panes vengveng ilemi ako nomenga i ri nge lale ve aro i sungu i a menumu na thomu o oma i ranga ve ako ilemi mire nge ako aro thomu o oma i a i nge, ako thomu o sungu i a toko le vothung kerengare omeni mo o pamona i a won ngoronga nge mo o pun rin i.

²⁴Aveto God i pamimi werera i ma i eltetpot rinong a sisisong a i nge. Eneke rinong i pavurvur aro ile mong i avele.

²⁵Na Devit kene i ri vene nge i, “‘Na tho thopol Toko Pomnga ako i voth tomo nge tho evelelnga. I voth tomo nge tho ma i paengeng tho taro ake o pakerenga tho avele.