Paisowa 2:7-44

⁷Sa tauhiti ma lau noꞌodi tiyen, Hola au atahi. Dodoga mahudoꞌidi sa libaliba te mate Galili dodogadi.

⁸Sidohana be esega - esega te atahi alinada yai sa libaliba?

⁹Ita eda aba laoma mate: Patiya yai, Mediya yai, na haisa Elam yai. Ita hahaisa mate Mesopotamia yai, Diudeya, Kapadosiya, Pontusi yo Eisiya yai,

¹⁰yo Figiya, Pamfiliya, Idipi yo Libiya tefadi yai, Sailin nuꞌuna sadasadaina yai te laoma. Na hahaisa mate tau antaumana Loma yai sa laoma Yelusalem.

¹¹Diusi yo taꞌowawa safaluma Diusi edi laulauꞌuꞌula sa laulau watan, yo Keliti yo Alabiya, mahudoꞌida te atahi mate Yaubada laulau gigigibwalidi yo noꞌo ginaulidi, te atahiyedi alinada yai!

¹²Sa noꞌo yo sa nuwa ponopono be sa fafatiꞌo fuyoꞌidi tiyen, Ite aniyona somo?

¹³Na hahaisa sa lau faliuhwaꞌedi tiyen, Sa nom yauyaule?

¹⁴Habahim Pita yo tau faꞌona wasawasa safuhudohudoꞌi esega sa obiyo fahi na ya liba laꞌilaꞌi baiwa lisidi iyen, Falegu Diusi yo salumadi mahudoꞌimiu Yelusalem yai ami miyamiya, au ataꞌatahi laoma lisigu na aniyona somo haba emi E liba.

¹⁵Emi nuwatuhu bena tatau te sa nom yauyaule. Higeꞌe! Itete hola 9 koloki ma hwalahwalalana.

¹⁶Itete fuya bwaꞌibwaꞌina yai Peloweta Diyoweli haꞌa ya libaen:

¹⁷“Yaubada iyen, “‘Fuya ofiꞌofidi yai haba Yaluwagu E fagoi dodoga mahudoꞌidi ai lebedi. Yo nanatumiu wawahin yo tatau haba sa liba peloweta. Ami hewahewali haba tautau sa itadi, yo emi tautaulaꞌi haba sa eno suwai.

¹⁸Yo egu tau paisowa tatau yo wawahin lahaidi yai ni haba Yaluwagu E fagoi ai lebedi, be haba wasa loholohona sa lauguguyaꞌen.

¹⁹Noꞌo abiꞌabidi haba E ginaulidi ai galewa, yo ai tanoꞌubu. Haba fafaꞌilala, ꞌwasina yo oyagi balebalelemdi yo madagafu E fataumahatadi.

²⁰Maihala haba ya kamukamumu, na Guyau ena fuyoma lahaina haꞌa ya sigisigima.

²¹Yena sai Guyau hesana ya ataꞌatahi haba ya mwahuli.”

²²Pita iyen, Isalaela dodogadi, au ataꞌatahi! Ganahewamiu yai Yesu Nasaleta ena dudulai Yaubada ya fawananaha, logena lisina yai noꞌo yo fafaꞌilala ya ginaulidi mate umi ami sibaidi.

²³Yaubada ena nuwatuhu yai Yesu ya fasinabo nonohai be sa tole afulen nimamiu yai, na dodoga heyaheyayadi sa saguhimiu be ami tutu fapatu kolosi yai.

²⁴In moho Yaubada ya famwahuli fuyoi peꞌi kamkamnana yai paꞌana peꞌi hige gonowana i abi didini.

²⁵Kin Deiwidi haꞌa ya libaen iyen, “Fuya ouꞌouli Yaubada sadaigu yai E itaꞌitai. Paꞌana In maꞌegu, be ibege agu waiyunu ya ꞌwasabuwedi.”

²⁶Lisina yai nuwagu ya amna be E kwade yo E fadebasae. Yo E gogo susunuma mate taugu haba ya anyawasi,

²⁷paꞌana ibege tau peꞌipeꞌi edi nuꞌu yai u lau afulegu, yo ibege em Fatabu Dogana u ita afulen, be tauna i molu ai boꞌusa.

²⁸Mwahuli edaꞌedana haꞌa wa faꞌitagu; Yo Um ai matam haba E kwade wananaha.

²⁹Afa haidagu, E faliba komakomaꞌinimiu mate ada ulu tubu Deiwidi haꞌa ya peꞌi be sa boꞌusai na boꞌusana mate hola otana amaiteꞌi.

³⁰In mate peloweta na ya sibai mate Yaubada haꞌa ya angwala lisina yai haba Deiwidi laulauwewena hesa ya famala Baꞌisa gonogonowana doha in Deiwidi.

³¹Fuya matada yai somo haba ya tubu, mate Deiwidi haꞌa ya sibai, be ya liba iyen, “Keliso haba ya mwahuli fuyo, yo ibege ai boꞌusa i ita afulen be silanna i molu.”

³²Boꞌusa yai Yaubada, Yesu te ya famwahuli fuyoi, be matamai yai haꞌa ꞌe ita.

³³Tamana Yaubada ya tole hitiꞌi be sibana yai aba fafaꞌatiti yai ya taꞌai. Ena liba fasunuma mate Yaluwa Tabuna ya felen, Yesu. Logena ya fagoi lidiyen hewada yai mate, haꞌa ami ita yo ami atahiyen.

³⁴Deiwidi hige i hasai galewa. In moho ya liba iyen, “Guyau Yaubada ya libalau egu Guyau lisina iyen, ‘Ai sibagu u taꞌai,

³⁵ya lau ee–, am waiyunu E toledi ai ahem ubudi doha ahem aba tolena.”

³⁶Lisina yai Isalaela mahudoꞌidi bena sa siba komakomaꞌi mate Yesu te, In ami tutu fapatu, logena Yaubada ya tole Guyau yo Keliso.

³⁷Dodoga liba te sa atahiyen. Yo fede aluwadi sa potifahi be Pita yo tau faꞌona wasawasa hahaisa sa falibadi tiyen, Afa haidamai somo haba te ginauli?

³⁸Pita alinadi ya bui iyen, Esega - esega u nuwabui be u babasito Yesu Keliso hesana yai haba em heyaheyaya ya nuwa afulen na Yaubada ena ainauya, Yaluwa Tabuna wa abi.

³⁹Liba fasunuma te ya laowa umi, nanatumiu yo safalumadi iti eda lofalofa yai tau miya enehemiu yo safalumadi Guyau eda Yaubada ya yogaimiu, enehemiu.

⁴⁰Habahim, Pita ya lauguguya lofalofa na ya liba adidili lau tau ataꞌatahi lisidi yai iyen, Yaubada au anꞌetai be hiti heyayana ganahewadi yai te, haba ya saguhimiu be ami anfaleꞌedi.

⁴¹Safalumadi ena liba sa lau watan mate sa fababatisodi na lahaina yai dodoga laꞌina tausan faihona sa lobahi be sa falau esegahi tau faꞌona wasawasa edi pei yai be edi pei ya laꞌi.

⁴²Edi fuya sa peidi tau faꞌona wasawasa edi lau faꞌata yai yo edi faꞌoigogo yai sa anꞌangogo yo sa laulauꞌuꞌula gogo.

⁴³Noꞌo ginaulidi boludi yo fafaꞌilala hudoꞌi - hudoꞌi tau faꞌona wasawasa sa laulau ginauli be dodoga sa ꞌwasabu.

⁴⁴Tau kawawananaha mahudoꞌidi sa fafaꞌoigogo fuya ouꞌouli yo ginauli mahudoꞌina lebedi yai sa faifaisagusagu fuyoꞌidi.