Paisowa 16:13-34

¹³Sabati yai ꞌe lau hoꞌowa sadaina, taon ganamulina yai. Ema nuwatuhu bena haga Diusi edi aba laulauꞌuꞌula hesa amainiya. Be ꞌe taꞌai, na ꞌe fatubu ꞌe libalau wawahin salumadi sa faꞌoigogoma amainiya, lisidi.

¹⁴Tau ataꞌatahi esega ganahewadi yai hesana mate Lidiya. In Tayataila waihinina, yo Yaubada ya fafadebasae. Kaleko kapikapitadi maisa laꞌilaꞌidi ya uneꞌuneꞌedi. Guyau, waihinna nuwana ya tasoꞌe be ya ataꞌatahi lau Paulo lisina.

¹⁵In yo ena luma tau miyaina sa babasito, mulina yai mate ya anꞌetaimai, iyen, Yena ami nuwatuhui, Guyau Yesu E kawawananahaꞌen mate au laoma egu ai luma, au miya. Yo fede, ya nuwa liumai be ꞌe famala ana taumana.

¹⁶Fuya ma esega, ꞌe lau aba lauꞌuꞌula nuꞌuna, na tau lau fayofayo waihinina hesa ꞌe failobahi. Yaluwa heyaheyayana ganahewana yai, be somo haba ya tubu ai matadi ya libalibaedi be moni laꞌilaꞌi ya ginauli ana tanutanuwaga, enehedi.

¹⁷Paulo maꞌemai ꞌe laulau, na waihinna te ya lau watanimai, be ya yoga laꞌilaꞌi, iyen, Dodoga te Hewa Wananaha Yaubadana ena tau lau fayofayo! Mwahuli wasana sa laulauguguyaꞌen lebemiu yai.

¹⁸Fuya ouꞌouli doha ite ya ginaginauli, ya laulau ee–, Paulo ya nuwa halahala yo fede, ya timuli bui, be ya libalau yaluwa heyaheyayana lisina, iyen, Yesu Keliso hesana yai E falibam, waihin ni u lau afulen! Maihalana yai ni, ya lau afulen.

¹⁹Ana tanutanuwaga sa sibai mate, edi moni aba ginaginaulina edaꞌedana haꞌa ya kwalugeluge. Yo fede, Paulo yo Sailasi sa tohaidi, be sa feli lawedi maketi yai, babaꞌisa matadi yai sa faꞌobiyodi.

²⁰Sa foya lawedi Loma edi tau fafadudulai lebedi, na tiyen, Diusi dodogadi te, eda dodoga sa eli fasifasinadi.

²¹Laulau haisa sa lau faꞌataꞌedi, mate, ita, Loma dodogada, te laugagayoꞌedi. Abiꞌabi te, hige gonowana ta abi watandi.

²²Yo fede, dodoga mahudoꞌidi Paulo yo Sailasi sa tulufidi, habahim, tau fadudulai sa liba be adi luhuluhu sa pwala fahidi, na mada yai sa talaidi.

²³Sa tala fafaheyayadi, mulina yai, deli yai sa gudu buluhidi, be deli tau ita watanina sa faliba bena ya gudu komanidi.

²⁴Deli tau ita watanina sa faꞌoiliba, be ya lawedi deli bilina ganahewana yai, Amainiya, ahedi sa tole lawedi timba luwaga atiꞌatipudi yai, be sa hafitidi.

²⁵Nuwana doha maihona atipuna, Paulo yo Sailasi sa laulauꞌuꞌula yo sa wanawana lau Yaubada lisina, na tau lau deli haisa mate, sa ataꞌatahi watanidi.

²⁶Maꞌesega! Mwanuꞌunuꞌu laꞌilaꞌi ya fatubu, be deli lumana umeꞌehudi paꞌa yai ya fadihodihodi. Yo fede, edaꞌeda mahudoꞌidi sa tasoꞌe yo tau lau deli mahudoꞌidi ahedi senidi sa taufahi.

²⁷Deli tau ita watanina ya eno obiyo mate, deli edaꞌedadi haꞌa sa tasoꞌe, ya itadi. Ena nuwatuhu bena haga tau lau deli haꞌa sa gela, be ena baineti ya solufahi, bena ya gwali fuyoi.

²⁸Na Paulo ya yoga laꞌilaꞌi, iyen, Tabu ibom u faheyaya fuyoim! Ai mahudoꞌimai, ite!

²⁹Deli tau itaꞌita watanina mala ya anꞌetai, na ya lautafo lau, be ya guli lidi Paulo yo Sailasi ahedi yai, ma tabutabubuna.

³⁰Habahim, ya foya lawedi ganamuli, be ya fatiꞌoidi, iyen, Babaꞌisa, somo haba E ginauli, be Guyau ya fofofahigu?

³¹Alinana sa bui, tiyen, Guyau Yesu u kawawananahaꞌen, haba um yo em luma tau miyaina mahudoꞌidi ya fofofahimiu be ami mwahuli.

³²Habahim in yo dodoga haisa ena luma yai Guyau ena liba, sa falibadi.

³³Iꞌipana atiꞌatipuna yai ni, deli tau ita watanina ya lawedi, be adi omata ya kaisudi; habahim feula na, in yo ena luma tau miyaina mahudoꞌidi sa babasito.

³⁴Paulo yo Sailasi ya lawedi ena luma yai, be adi kalahe sa suwa. In yo ana boga mahudoꞌidi nuwadi sa amna, paꞌana Yaubada sa kawawananahaꞌen.