Paisowa 13:1-46

¹Dubu Antiyoka nuꞌuna yai mate peloweta yo tau lau faꞌata haisa amainiya: Banabasi, Simiyon (hesana hesa “Duba”), Lusiusi (Sailin dogana), Manayen (maꞌena Kin Heloda sa laꞌilaꞌi saema), yo Saulo.

²Fuya hesa sa laulauꞌuꞌula lau Guyau lisina yo sa anꞌandabu na Yaluwa Tabuna ya falibadi, iyen, “Banabasi yo Saulo au fatabudi, be haba adi paisowa hesa E feledi sa ginauli.”

³Sa lauꞌuꞌula yo sa andabu mulina yai, nimadi sa tole lawedi lebedi yai, na sa duidi be sa lau.

⁴Yaluwa Tabuna ena liba yai Banabasi yo Saulo sa lau Selusiya be waga yai sa awa sa lau Saipelesi Bonabonaluwana.

⁵Salamisi taonna yai sa mahano mate Yaubada wasana sa lauguguyaꞌen Diusi edi aba oiꞌoigogo lumana yai. Tau sagusaguhidi Diyon Maleko maꞌedi.

⁶Bonabonaluwana mahudoꞌina sa laufi ee–, Pafosi taonna yai mate, doga hesa ayaꞌayahanna sa lobahi hesana Ba-Yesu. In Diusi dogana hesa. In moho, in peloweta bwalabwalana.

⁷Bonabonaluwa ni edi gawana hesana Segiyo Paulo, ena tau paisowa. Gawana mate doga sibasibana. Ya fanuha bena Yaubada ena liba ya atahi, be Banabasi yo Saulo ya yogaidi sa laoma lisina.

⁸Tau ayaꞌayahan ni, (Giliki alinadi yai mate, hesana Elimasi) ya nuwa oiꞌi, be Gawana ena kawawananaha nuwana yai, ya fagogoma.

⁹Habahim, Saulo, hesana hesa Paulo, Yaluwa Tabuna ya famohafu be ya itaꞌita lau tau ayaꞌayahan lisina, na iyen,

¹⁰Um Diyabolo natuna yo laulau dudulai mahudoꞌidi adi waiyunu! Diyabolo ena bwalabwala hudoꞌi - hudoꞌi sa famohafum, be fuya ouꞌouli, wa anpate bena Guyau ena laulau dudulaidi wa buidi, be bena bwalabwala! Haba wa fatautau e higeꞌe?

¹¹Guyau ena gigibwali haba ya talu ai hewam be matam haba sa tou, na fuya haisa ibege maihala malana u ita. Yo fede, Elimasi matana sa gafu, na ya leu ya sae, bena haba sai hesa ya abi nimai.

¹²Fuyana Gawana somo ya tubu ya ita mate, Guyau wasana lau faꞌatana ya noꞌoꞌen, be ya kawawananaha.

¹³Pafosi taonna yai Paulo ma afa haidana waga yai sa awa be sa lau Pelega taonna, Pamfiliya Nuꞌuna yai. Amainiya Diyon Maleko ya lau afuledi na ya fuyo Yelusalem.

¹⁴Habahim Pelega sa lau afulen na sa aulaha boda sa lau Antiyoka, Pisidiya Nuꞌuna yai. Sabatina yai sa luhulau Diusi edi aba oigogo yai be sa taꞌai.

¹⁵Mose ena Laugagayo yo peloweta edi uliꞌuli hahaisa sa fatilidi na mulina yai aba oigogo babaꞌisadi liba sa fatamali lawen Paulo ma afa haidana lisidi, tiyen, “Haidamai, haba emi liba faꞌadidili somo? ꞌE fanuha bena ema ami liba!”

¹⁶Paulo ya obiyo fahi, nimana yai fafaꞌilala ya ginauli, na ya liba iyen, Isalaela tataumiu yo taꞌowawa mahudoꞌimiu salumadi Yaubada ami fafadebasaeꞌen, au ataꞌatahima!

¹⁷Isalaela dodogadi yo ita eda Yaubada wahawahada ya fasinabodi yo Idipi yai fuyanna sa miya taꞌowawa mate ya fatadadadi be sa talu fanafanatu. Yaubada ena gigibwali yai Idipi yai ya foya fahidima,

¹⁸yo laulau somo sa miyamiyaꞌen nuꞌu pitapitalina yai, in moho hola ya ita watanidi ee–, bolima 40.

¹⁹Kanana nuꞌuna yai nuꞌu ouꞌoulidi faligigi luwaga ya faheyayadi, na tanohidi ena dodoga ya feledi, aiꞌedi.

²⁰Ginauli te sa tubu ya lau ee–, be bolima begana haba 450 mulina yai, Yaubada tau fafadudulai ya feledi ya lau wee–, Peloweta Samuwela ena fuya yai.

²¹Habahim dodoga Samuwela sa anꞌetai tiyen, “Bena ema kin.” Be Beniyamin ena sulu yai Kisi natuna Saulo ya feledi ya famala edi kin, bolima 40.

²²Yaubada Saulo ya abifahi mulina yai, Deiwidi ya faꞌobiyo, enehedi. Yaubada Deiwidi te ya libaen, iyen, “Dogana E gadolele mate, E lobahi. In mate Desi natuna, Deiwidi. Ginauli mahudoꞌina E fanuha bena ya ginauli, haba ya ginauli watan.”

²³Yaubada ena liba fasunuma ya fawananaha doha ite, Deiwidi laulauwewena yai Yaubada mate tau fafamwahuli Yesu ya leyama Isalaela lebedi

²⁴Hola hige Yesu ana paisowa i fatubu na Diyon Isalaela dodogadi mahudoꞌidi ya lauguguyaidi bena sa nuwabui yo sa babasito.

²⁵Diyon ana paisowa ya fafaꞌofi lawen na ya liba iyen, “Ami sibai bena yau, sai? Sai ami bagibagiyen mate hige yau. Muligu yai ya laolaoma mate in ya laoma yau hige ya loholoho haba ana sendolo mahinadi ya tatafahidi.”

²⁶Afa haidagu, Abelaham afa wahana yo taꞌowawa dodogadi salumadi Yaubada ami fafadebasae! Mwahuli wasana te haꞌa ya laoma ita lisida.

²⁷Yelusalem dodogadi maꞌedi edi babaꞌisa somo peloweta edi uliꞌuli yai, mate hige Yesu ti ita lobahi. In moho edi lau fagilu lisina yai mate peloweta edi uliꞌuli Sabati fuya ouꞌouli sa fatifatilidi wa, sa fawananaha.

²⁸Hige mata hesa loholohona ti lobahi, be haba Yesu ti wunui, in moho, Pailati sa anꞌetai, bena ya tutu fapatu.

²⁹Fuyanna wasana mahudoꞌina Buka Tabuna yai sa uli, sa ginauli watan ya ofi, mate aba tutu fapatuna yai sa taluhi fahi be sa boꞌusai.

³⁰In moho peꞌi yai Yaubada ya famwahuli fuyoi,

³¹be lahai peidi ya taumahata lau safalumadi maꞌena Galili yai sa lau Yelusalem lisidi. Iti sa fatala libalibaen eda dodoga lisidi yai.

³²Wasa loholohona ꞌe leyama lisimiu! Somo Yaubada haꞌa ya liba fasunuma bena ya ginauli wahawahada lebedi yai, aho te, ita iti laulauwewedi lisida yai ya fawananaha, fuyana Yesu peꞌi yai ya famwahuli. Doha Samsi fafaluwagana yai sa uli tiyen, “Um mate Natugu. Aho te, Yau E famala Tamam.”

³⁴Wananaha peꞌi yai Yaubada ya faꞌobiyo fuyoi, ibege i molu, doha Buka Tabuna yai haꞌa ya libaen, iyen, “Libadi wananahadi yo fafatabudi faloholohodi somo, Deiwidi E liba fasunumaꞌen, haba E felemiu.”

³⁵Gonogonowana doha lausoisoi hesa yai hinaga ya libaen, iyen, “Doga Fafatabuna ibege u ita afulen, i molu.”

³⁶Deiwidi ena fuya yai mate, Yaubada ena nuwatuhu Deiwidi ya ginauli watan. Habahim ya peꞌi, be afa wahawahana edi aba toledi yai sa boꞌusai, be tauna sa molu.

³⁷In moho, Yaubada sai ya faꞌobiyo fuyoi, hige i molu. In mate Yesu!

³⁸Afa haidagu, E fanuha bena ami sibai mate heyaya biya afulenna Yesu lebena yai, haꞌa sa lauguguyaꞌen lisimiu yai.

³⁹Mose ena laugagayo hige gonowana heyaya yai i biya afulemiu. In moho, safalumadi Yesu sa kawawananahaꞌen, haba heyaya yai ya biya afulen.

⁴⁰Au ita komakoman! Somo peloweta sa libaedi, ibe ti tubu ai lisimiu:

⁴¹“Tau ala liuliuhwaꞌenna! Haba ami noꞌo, in moho haba ami peꞌi! Paꞌana emi ai fuya haba ginauli E ginaulidi. Ibe sai emi ya liba, ibege au kawawananahaꞌen!”

⁴²Paulo yo Banabasi Diusi edi aba oigogo lumana bena haba sa lau afulen, na Diusi yo taꞌowawa salumadi Yaubada sa fafadebasaeꞌen, sa anꞌeta bodaidi, tiyen, Sabati hesa au fuyoma, be ginaulidi te ema au dede fuyo.

⁴³Oigogo ofina yai, Paulo yo Banabasi sa laulau na Diusi yo taꞌowawa salumadi Diusi edi Yaubada sa kawawananahaꞌen, sa lau watanidi. Tataudi luwaga sa liba faꞌadidilidi, tiyen, Bena Yaubada ena anꞌansoi ami laulawen.

⁴⁴Sabati hesa yai begana haba taon dodogadi mahudoꞌidi sa faꞌoigogoma, Guyau wasana sa atahi.

⁴⁵Diusi dodoga baiwadi sa itadi mate sa nuwa elaꞌela wananaha be Paulo ena liba sa anꞌeli dogodogoi yo sa liba fafaheyaya.

⁴⁶In moho, Paulo yo Banabasi ma nuwa adidilidi, tiyen, Wananahana bena Yaubada libana ꞌe faliba bwaꞌiyemiu, na umi Diusi dodogamiu libana te, ami waiyoꞌoꞌen. Na ami laulau fagilu fuyoꞌimiu. Logena mwahuli otaꞌota fahina hige gonowana au abi be aho te ꞌe lau afulemiu na ꞌe lau taꞌowawa lisidi.