Pâri Tamâta 18:13-26

¹³“Tamâta ŋai uru ipanananzi tamâta ŋana sipu mulinzi pa ŋgua tukuŋa, ŋana tu i uru ipanananzi vetâŋa soki-soki ŋana siwâŋgi sipanea Maro Kindeni.”

¹⁴Paulo nde itu iporo ŋgua taulo panzi, andeta koipu ŋalae Galio ipainzi Juda tamâta ŋinde tu, “Opopo, miki Juda tamâta! Ambo tu tamâta ŋine muŋga ilaŋa ipole ŋgua tukuŋa tâku iveta vetâŋa soki toŋge tâ, ande ara, naŋa ma aloŋo nemi ŋgua.

¹⁵Taitu miki kamâ kakasoŋa naŋa ŋana ŋgua wa ŋoa pinde ŋana miki warakami nâ nemi ŋgua tukuŋa kâ. Mine nde kalo loko, miki warakami nâ ma kaveta ŋine sondo. Naŋa tiniŋgu pwâka tu aloŋo ŋgua ŋana mâsi mine kâ.”

¹⁶Galio iporo ŋgua ŋine lâ, ŋineŋga iŋaranzi ŋana ŋgua nia kâ.

¹⁷Tia ku kinzi Juda tamâta sikai Sostenes, ina uru ikatona Juda nenzi luma ŋana pasauŋa kâ, aku sipu pâta lâ ŋgua nia nao. Aŋga koipu Galio nde ilo rârâ ŋana nenzi vetâŋa ŋinde kâ, ande tia.

¹⁸Paulo imo Korin laweani ikura zo pinde lâ, ŋineŋga ilâ pa Senkria lawea ku igiru i tamwata kulu pwau piti lâ. Iveta mâsi mine ŋana itula panzi tamâta tu i muŋga iveta ŋgua pâŋa toŋge kuku Maro Kindeni. Iveta mâsi ŋinde lâ, ŋineŋga ikâki wâŋga toŋge kulu kunzi Prisila ku Akwila rua, aku sipilenzi kalo-tawana tamâta ku silâ pa Siria tâno.

¹⁹Kinzi silâ lee sitoa Efesus lawea, ŋineŋga Paulo ipilenzi Prisila ku Akwila rua. Aku i simbo nâ ilâ Juda nenzi luma ŋana pasauŋa kâ ilo, aku iporo ŋgua panzi Juda tamâta simo ŋinde.

²⁰Kinzi Juda tamâta sino Paulo tu ma imo ndaina kunzi ikura zo pinde. Andeta Paulo ipainzi tu, “Naŋa ma amo ŋine kuku miki tia.”

²¹Paulo iveta ŋana ma ipilenzi ku ilâ, ŋineŋga ipainzi tu, “Ambo Maro Kindeni ma ipatea nzâla pana, ande naŋa ma ataulo amâ amo kumi kilo”. Iporo ŋgua mine lâ, ŋineŋga ikai wâŋga kilo ku ipile Efesus lawea ku ilâ.

²²Wâŋga ikâwa ilâ lee itoa Sisaria lawea, ŋineŋga Paulo ipile wâŋga ku ikâki ilâ pa Jerusalem lawea. I ilo tu ma iporo ŋgua pinde panzi kalo-tawana tamâta simo ŋinde. Iporo ŋgua marumbu lâ, ŋineŋga indue ilâ pa Antiok lawea.

²³Paulo imo Antiok lawea ikura zo pinde lâ, ŋineŋga ipilenzi ku iyoka ilâ pa lawea pinde ikeno Galesia tâno wa Frigia tâno wa. Ilâ ikura tâno ŋinde ndoni ku ipu tini kaika panzi kalo-tawana tamâta rârâni simo ŋinde.

²⁴Aku pa zo ŋinde, Juda tamâta toŋge, i ŋa mine Apolos, ande ilâ imo Efesus lawea. I tamwata ne lawea tina nde Aleksandria. I nde tamâta ŋana iporo ŋgua ara kâ, aku i muŋga ipanâna sondo ndo ŋana Maro Kindeni kawa ŋgua ikeno lâ pepa tini.

²⁵Kinzi tamâta pinde muŋga sipanana i ŋana Maro Ŋalae ne nzâla kâ, aku i ilo ndo tu ma ipono muli pa Maro Ŋalae. I uru iporo itula ŋgua sondo nâ ŋana vetâŋa rârâni Yesu muŋga iveta ŋinde. Taitu isama Yoane Lââ-Liliŋa Tamwata nâ ne lââ-liliŋa.

²⁶Apolos iruru ŋananzi tamâta, ande tia. Ilâ Juda nenzi luma ŋana pasauŋa kâ ilo ku iporo kaika itula ŋgua pwataki. Aŋga Prisila ku Akwila rua siloŋo i kawa ŋgua ŋinde, ŋineŋga sikai Apolos silâ nenzi luma ilo ku situla Maro Kindeni nzalani sondo ndo papa.