Oweziwa wa Yinsa 8:2-32

²Atthu akina ooshapweya rooho khunthuula Shiteefanu otule khulawa khunzikha eettaka onlilela.

³Aphano Saawulu aari ojilipisa yoori eeshise khuntthi ya atthu apale aari onlottaaye Yinsa. Ye aari ovira nyuupa khwa nyuupa khusala awaakho alume na aakha apale aari onlottaaye Yinsa n'oowaattha nkalapooso.

⁴Atthu apale omwaziyeyeeyo aari ovira alaleyaka hapari wakhula vahali aari ofiyaavo.

⁵Filiipe eettiye sitati ya Samariya, n'oofiya khusala owooza atthu monkoni wa Yinsa.

⁶Wakathi atthu asiiliyeevo saneene hapari epile aari olupaazo Filiipe na knoona minjuza aari arettaazo, yo aashineheliye mattakhuzi apale ye aari olupaaye.

⁷Atthu akina aariina majini aari owaasaruwa eettaka onyakhula, alupa oorakala enkeene opiya ti sapiyeene na apale oorakala.

⁸Sitati yaya etile waapuwiyeyo furaha khuluyeene.

⁹Aarivo mwinyi mmote aari wiitthiwaaye Simawu, aari wiikhalaaye sitati ethiitile, aari nshawi, atthu ooshi asamariya aari onshankela vitthu za majintta aari orettaazo. Ye aari ojoona wiiya munumunu,

¹⁰atthu ooshi, waaza nttunkhulu mpakha nsimaana na onttottopela araka: “Otu onaaye aariinaaye walankha pinkuuni, onjuwiwaaye yoori owahi nwulweene.”

¹¹Aphano, yo khusala alipana othuuuto mwaasa yoori aaziye raku oretta vitthu za majintta za owaatikinisa.

¹²Ila paata ya Filiipe owaatafusirela monkoni wa hapari zooshapweya ya ofwalume wa Nnyizinku khwa nzina la Yinsa Al-Masiihu, yo khukhupali na khulawa khoosiwa, alume enkeene mpakha aakha.

¹³Simawu othuuto aari orettaaye majintta, na-ye khunkhupali Yinsa khoosiwa, khusala onlottelela Filiipe wakhula phantte aari weettaaye, oonaka vitthu zootikinisa na minjuza miwuluzene zaari orettikhanaazo.

¹⁴Wakathi maaswihaapa asiiliyeevo ari Yeruzaleemu, oriwa atthu a Samariya opokherela nttakhuzi la Nnyizinku, khumperekhawo Pheeturu na Yaahaya.

¹⁵Yo n'oofiya khwaalompela atthu aya apale yoori apokherela Rooho Ttakatthiifu.

¹⁶Maana khaarivo hatha mmote wa yo ompokhereliyeeyo Rooho Ttakatthiifu, ila eettiye woosiwa paasi khwa nzina la Bwana Yinsa.

¹⁷Pheeturu na Yaahaya khuwaattela makhono atthu apale khupokherela Rooho Ttakatthiifu.

¹⁸Simawu nawoona yoori ntthu aari opokherela Rooho Ttakatthiifu paata ya ottheeliwa makhono ti maaswihaapa, ye khulaza nzurukhu,

¹⁹khuwooza maaswihaapa yoori: “Kintakha na-miyo mwikinkhe owahi nkhama otthuupo mwiriina, kisala kiwaattheela makhono atthu n'oopokherela Rooho Ttakatthiifu.”

²⁰Pheeturu khunjipu yoori: “Nzurukhu awo otthuupo ontta wuuthowelelisa! Weeyo onoona yoori tthuvo ya Nnyizinku enuuzanyiwa na nzurukhu?

²¹Weeyo nkatthi wa khaazi yetthu eti Nnyzinku khaniwinkha hatha phantte maana rooho yawo khahi rooho saana.

²²Othupwiye vitthu zootakhala na olompe khwa nzina la Nnyizinku. Talili othuuto oswammihi khwa ofikhiri opo woovonyeya wa nroho mwawo,

²³kinoona yoori nroho mwawo ziwaamo pure vitthu zoovonyeya na washawashawiwa ti twampi.”

²⁴Simawu khujipu yoori: “Mwikilopele, yoori zooshi epo mwilupiyeezo khwa miiyo zihikirettikhanele.”

²⁵Paata ya Pheeturu na Yaahaya olawela oshahipi na otafusiri nttakhuzi la Nnyizinku khulankha khusala arutela Yeruzaleemu, olawaka aari ovira atafusiraka miti mikina za Samariya ethiitile.

²⁶Nlayikha la Mbwana khumuuza Filiipe yoori: “Weette ntarikhi elikhiya raku oviriwa eriiye phantte ya kusini elankhiyeeyo Yeruzaleemu eniishukhelaaye sitati ya Kaaza.”

²⁷Filiipe nawuuziwa khulankha khusala alawa. Ntarikhi khunsikana mwinyi mmote wa Etiyoopiya woohimemi, alankhaka Yeruzaleemu eettaka owawe. Oto aya aari nakhazi nwulu enkhiweeyo othokorela mizurukhu za Rayisi nwulu wa Etiyoopiya aari wiitthiwaaya Khantase. Eettiye Yeruzaleemu omwaaputu Nnyizinku.

²⁸Arutaka, apakhiriye varikisho khusala asoma kithaapu ya napiyu Ezaaya.

²⁹Aphano, Rooho Ttakatthiifu khumuuza Filiipe yoori: “Otthirele rikisho etile osala olottelela.”

³⁰Filiipe khutthirela rikisho etile khusikana khusala ansiila mwiitiyoopiya otule asomaka kithaapu ya napiyu Ezaaya, ye khumuuzela yoori: “Mattakhuzi apo mwinsomaaye aniweeleyani?”

³¹Ye khujipu araka: “Anikeeleza toovi kihina ntthu wookeeleza?” Khumuuza Filiipe yoori owele varikisho attaaphale aarivo ye.

³²Mattakhuzi aari osomaaye mwiitiyoopiya otu a nkithaapu mpule ari olupa toono: “Ye aathuuliwe nkhama pwittipwitthi eneettelaaye wuuliwa, nkha pwittipwitthi yoohittakhuli eri vakatthi wa apale ankasaaye ovuziwa pwittipwitthi, Ye khaattakhuliye hatha etthu.