Oweziwa wa Yinsa 7:12-59

¹²Yaakhumpa n'oosiila yoori eewaakho tiriku Misuri, khuwaaperekha amarehemu etthu swaafu yamwanzo.

¹³Swaafu yaphiiri yoorutelawo amarehemu etthu, Yuusufu khujijuwisa vakatthi wa attwiize, Firawuuna khuwahi owaajuwa ajaama a Yuusufu.

¹⁴N'oojijuwisa Yuusufu khuwaaruma atthu omweetala papaaze na ajamaaze ooshi, aari sapiini na athaanu atthu eene.

¹⁵Aphano Yaakhumpa khusala alawa Misuri, ottuukho afwiyeewo ye na amarehemu etthu akina.

¹⁶Mwiili aya khuthuuliwa khurutiseliwa Shekemu khuzikhiwa nlikulukupo ntthile oozanyiyeeyo Eburahiima na aana Hamori wa nzurukhu khata.

¹⁷Ofiyaka wakathi Nnyizinku aari weettelaaye oretta etile aamwaahitiyeeyo Eburahiima, khuweekezela atthu etthu khwiiya a waatta nti wa Misuri.

¹⁸Khwinkhiwa ofwalume ntthu nkina, ahaari ojuwaawe hatha etthu monkoni wa Yuusufu, khwiiya mfwalume wa Misuri.

¹⁹Mfwalume otule khusukuliwela ajama etthu na khuwaahukhumu amarehemu etthu, awaakhanyerelaka owaalikha aana aya yoori ahiwahi owula.

²⁰Wakathi otthuupule khuvokoliwa Munsa, oto aari mwaana wooshapweya oomaasho wa Nnyizinku. Khwa nyeezi mittatthu eettaka oleliwa vaje wa apapaze.

²¹N'oolikha oleliwa pi apapaze, mwaana wa Firawuuna khunthuula khusala anlela nkhama mwanawe wonvokola.

²²Munsa khuleliwa na ojuwa wooshi wa Amisuri, khwiiya ntthu woowahi khwa a mattakhuzi awe na khaazi zawe.

²³Apatthiyeevo hirimu ya nyaakha arupayiini, Munsa khulekela olawa owaathotola attwiize Meezirayeele.

²⁴Amooniyeevo Mmisuri anhukhumwaka Mwiizirayeele, khumpattha katapu mwaasa woohukhumwiwa, khumuula Mmisuri otule.

²⁵Ye aari woona yoori attwiize enlawa yaweeleye yoori Nnyizinku ontta onrumeyela yoori awoosuru, ila yo khayaari oweeleya hatha etthu.

²⁶Siikhu yaphiiri, Munsa khulawa vahali aari oshezaavo Meezirayeele awiri, khusala awooza yoori: ‘Alume, mweeyo mwa ntthu na ttwiiye; khi mwaasa aya niini mwilwaazanaka?’

²⁷Ila nlume otule aari onlwaazaaye nzaawe, khunsukhuma Munsa khumuuza yoori: ‘Paani oothawuliyeeyo yoori wiiye namalokozela etthu na namphuka milattu zetthu fweeyo?

²⁸Ontakha okuula nkhama omuuliyeezo Mmisuri taana?’

²⁹N'oosiila mattakhuzi apale, Munsa khutthirela nti wa Midiyana, khusala eekhala ottuukho nkhama nletto, khuwaapattha aana awe awiri.

³⁰Avirisiyeevo nyaakha arupayiini ottuukhule, khumpuwelela nlayikha vamweeke wa moottho wa haari ozimaaye n'yaara, kharipu ya mwaako Sinaayi.

³¹Munsa vakatthi wa moottho opule khwiiya wootikinisiwa. Khususela attaaphale yoori oonachache, khusiila huula ya Mbwana Nnyizinku:

³²‘Miiyo ki Nnyizinku wa amarehemu apapazenu, Nnyizinku wa Eburahiima, Nnyizinku wa Esiyaakha, Nnyizinku wa Yaakhumpa.’ Munsa eettaka othukumela mwaasa wa woova, khuhisala awahi ofunula maasho awe.

³³Aphano Mbwana Nnyizinku khumuuza yoori: ‘Ovule jampali epo ziri mmoolu mwawo, mwaasa wa puuro li weeyo oriiyo nti ttakatthiifu.

³⁴W'eekhweele keetta owoona atthu aka ahukhumwiwaka nti wa Misuri. Kasiila olila waya khwiishuka yoori kiwoosuru apho. Ote nasaapi, miiyo kurutisele nti wa Misuri.

³⁵Otu ti napiyu Munsa, othuuto mwankatthaliyeeyo na mattakhizi apa yoori: ‘Ti paani oothawuliyeeyo yoori wiiye namalokozela etthu na namaphuka etthu?’ Ye aaperekhiwe ti Mwennyewe Nnyizinku yoori eeye namalokozela na namwawuni aya vakatthi wa nlayikha lampuweleliyeeyo vamweeke wa moottho wa haari ozimaaye.

³⁶Munsa othuuto awaalaziyeewo amarehemu etthu Meezirayeele nti wa Misuri, arettaka vitthu zootikinisa na minjuza za waatta nti wa Misuri, pahari yookhuttuwa na nyaara aavirisiyeemo nyaakha arupayiini.

³⁷Otu ti Munsa othuuto awooziyeeyo Meezirayeele yoori: ‘Nnyizinku onlawa ampuwise vakatthi wa attwiizenu napiya mmote nkhama miiyo.’

³⁸Ye aari woothukumana, n'yaara na nlayikha laari onttakhulanaaye vamwaako Sinaayi na amarehemu etthu, khupwekherela mattakhuzi haayi yoori anuuze na fweyo.

³⁹Ila amarehemu etthu khukatthala oshututela, na theenya khunkhijilela na nroho mwaya khurutela Misuri.

⁴⁰Khumuuza Arawu yoori: ‘Onaattalele nluku yoori anilokoze maana Munsa aya otule anilaziyeeyo Misuri khanijuweeni etthu empatthiyeeyo.’

⁴¹Wakathi otthuupule khwaattala sanamu yoolattanana mompe. Khutiisela twaha na khuretta njampo khwa osifu etile aarettiyeeyo na makhono aya.

⁴²Ila Nnyizinku khuwaasusu na khuwenkha waaputu matthottowa nkhama etthiipo yaatikhiweeyo a kithaapu ya manapiyu yoori: ‘Kaari miiyo otule mweeyo mwanliseliyeeyo twaha na zaakha nyaakhu epile arupayiini mweekhaliyeezo n'yaara, mweeyo omathi wa Ezirayeele?

⁴³Olikha toowo, mwajeka puuro ttakatthiifu ya Moloke na matthottowa a nluku enu Reefwa sanamu mweeyo mwaattaliyeeyo yoori mwisale mwaaputu wa attaapho, miiyo kintta wuuperekhani ohali okinoko olikha Babiloniya.’

⁴⁴N'yaara amarehemu etthu aarina huma yoosiilana, nttumpho Nnyizinku aari ottakhulananaamo Munsa heema yaya eto yaattaliwe nkhama etthiipo Nluku anrumiyeezo Musa yoori aattale, alikanisanaka etile anthoonyeziweeyo.

⁴⁵N'oopwekherela heema etile yoosiilana, amarehemu etthu khuthuula khumwinkha olokozela Yoshuwa, wakathi athuuliyeevo nti wa omathi opule Nnyizinku eekariyeeyo. Heema yaya eto khwiiya nti otthuupo mpakha wakathi wa Daawuuda.

⁴⁶Otu khupwekherala mahala mmakhono wa Nnyizinku, khuveka yoori anjekele nyuupa Nnyizinku wa Yaakhumpa.

⁴⁷Ila ti Seleyimaana anjekeliye nyuupa yaya.

⁴⁸T'iito Nnyizinku khaniikhala nnyuupa yoojekiwa ti pinaatamu, nkhama etthiipo alupiyeezo napiyu yoori:

⁴⁹‘Pinku khukulu yaka, vathi tarikhi ya moolu aka. Nanna-ni ya nyuupa mweeyo mwinttelaaye okijekela? alupaka Mbwana, ama, onteela wiiya vayi puuro yaka yoovumula?

⁵⁰Khihiye miiyo kaattaliyeeyo vitthu zaya epo zooshi?’

⁵¹Atthu ookifilina ootakhala rooho zaya epo zooshi! Mweeyo mwinlikanana na amarehemu enu aari okatthalaaye Rooho Ttakatthiifu!

⁵²Napiyu-ni amarehemu enu ahinlupattheeni? Yo amuula otule aari ohaayi wa anashariya, othuuto mwinrettiyeeyo onamalupattha na ohusuti.

⁵³Mweeyo mwipwekhereliyeeyo kano khwa khaazi za malayikha wala khuhi shutuleli.”

⁵⁴Asiiliyeevo mattakhuzi apale khuwaapattha katapu nroho mwaya, khusala anlumele meeno.

⁵⁵Ila Shiteefanu wawiitaala wene Rooho Ttakatthiifu khweekesa otulu khoona siifwa za Nnyizinku na Yinsa ari nkhono-nlume wa Nnyizinku.

⁵⁶Khulupa yoori: “Kinoona pinku eri yoofukuwa na Mwaana wa Pinaatamu eemeliye nkhono-nlume wa Nnyizinku.”

⁵⁷Ye khwaaza okhuwa woonyakulavo, yo khuttiyela mashiilo aya na khunrikanyela.

⁵⁸Khunsusisela othetekele wa sitati khusala anoonya na mawe, oshahiti aya khunlikhavo shapu aari wiitthiwaaye Saawulu yoori asalane kuwo zawe epile aawaliyeezo.

⁵⁹Eettaka onvonya etthiipile, Shiteefanu khusala alompa araka: “Mbwanaaka Yinsa, pwekherela nafusi yaka.”