Oweziwa wa Yinsa 5:4-15

⁴Niri talili khalaari nshapa lawo? Wala paata ya wuuzanyisa nzurukhu aya khawarina weeyo enu omwennyewe? Khi eti ewuupuwelisiye oretta vitthu nkhama epo niini? Weeyo apho ohooni yoori wawaahata anaatamu, ila wanhata Nnyizinku.”

⁵Paata ya Pheeturu wiisha olupa mattakhuzi apale, Ananiiya eetta ofwa attaaphale. Atthu ooshi apale aari omoonaaye na aari osiilaaye mattakhuzi aya apale khwiiya awoova.

⁶Khuta atthu khunkafwani khusala alawa onzikha.

⁷Eviriyeevo woora mittatthu muukhaawe khuteela weekesa ojuwa etthu emuuliyeeyo mannawe.

⁸Pheeturu khumuuzela yoori: “Nkahaya nkakuuze nzurukhu muuzanyisiyeeyo nshapa lenu pi otthuupo?” Muukha otule khujipu yoori: “Pi otthuupo.”

⁹Pheeturu khumuuza yoori: “Epo za niini mweeyo osiilana yoori mootoote Rooho ya Mbwana? Atthu apo oniwoonaaye vamilako apho pi atthaapo anzikhiyeeyo mannawo, alawa oozikhe na-weyo.”

¹⁰Kharipuzeena attaaphale, na-ye etta ofwa. Khuthuuliwa khulawa khuzikhiwa mpawa wa mannawe.

¹¹Atthu ooshi a khuntti etile yaari onlottaaye Nnyizinku khwiiya awoova na apale ooshi aasiiliyeeyo vitthu epo zaarettikhaniyeezo.

¹²Minjuza za waatta zaari orettikhanaazo vakatthi wa atthu zaari orettiwaazo pi maaswihaapa. Atthu ooshi apale onkhupaliyeeyo Yinsa aari okusanyeya nlipantta laajekiyeeyo ti Seleyimaana.

¹³Atthu akina etta woova okusanyeyana yo, ila atthu enkeene aari owaattottopela maaswihaapa apale.

¹⁴Atthu omwamini Yinsa khusala atepa weekezeleya waaya alume mpakha aakha,

¹⁵khufiyelela atthu akina awaathuula alwele n'oowaapweha ntarikhi awaatthiiye vanrepa ama voolili yoori nenkawu Pheeturu amana avirikha, yo owaapatthe mwiifuli awe.