Oweziwa wa Yinsa 5:14-40

¹⁴Atthu omwamini Yinsa khusala atepa weekezeleya waaya alume mpakha aakha,

¹⁵khufiyelela atthu akina awaathuula alwele n'oowaapweha ntarikhi awaatthiiye vanrepa ama voolili yoori nenkawu Pheeturu amana avirikha, yo owaapatthe mwiifuli awe.

¹⁶Aari ota atthu enkeene theenya oolankha miti mikina za waattamela Yeruzaleemu awaatisika alwele aya na apale aari ohoochiwaaye pi majini: ooshi khusala eeya oovonisiwa.

¹⁷Aphano, nttunkhulu a mahaakhimu na ashirikhaaya ooshi mpakha na atthu ooshi a khuntti ya masatukhi khuwaata nrima.

¹⁸Khuruma yoori okholiwa maaswihaapa khuwaafukela nkalapooso.

¹⁹Aphano osikhu wa siikhu ethiitile, nlayikha la Nnyizinku khufukula milako za kalapooso khuwaasarulela vaje,

²⁰khuwooza yoori: “Mwilawe nnyupa wa Nnyizinku, mwilawe mwawaasomise atthu monkoni wa ohaayi opu mpheya.”

²¹Maaswihaapa khushututela mattakhuzi apale ooziweeyo ti nlayikha ntthile, n'oocha khulawa mpakha vaje wa nyuupa ya Nnyizinku, khwaaza owaasomisa atthu. Aphano nttunkhulu a mahaakhimu a tiini na ashirikhaaya khuwaakusanya atthu na anamalokozela a tiini ooshi a Ezirayeele, khuruma olawa olaziwamo maaswihaapa apale nkalapooso.

²²Anamweekesela apale a kalapooso, n'oofiya nkalapooso khuhiwaasikanimo, khuruti n'oota khusala alupa yoori:

²³“Khaniwaasikaneenimo na nasikana kalapooso ya eri etthiipile naafukiyeezo na vaje aarivo anamweekesela akina, ila vakatthi nifukuliyeeyo milako khuhiimo hatha ntthu.”

²⁴Paata ya atthunkhulu apale, anamweekesela a nyuupa ya Nnyizinku na atthunkhula a mahaakhimu osiila mattakhuzi apale, yo khwiiya ooshanka mwaasa woohijuwi nanna eettettiyeezo maaswihaapa apale.

²⁵Wakathi otthuupule khutavo ntthu aari olupaaye owoozaka yoori: “Atthu apale mweeyo mwawaatthiyeeyo nkalapooso, miiyo kawaasikana vaje wa nyuupa wa Nnyizinku eettaka owaasomisa atthu.”

²⁶Khulankha anamweekesela na nttunkhulu aya khuweettela khusala awaatiisa, woohiwaalazili hatha kuvu, maana aari woova ovonyiwa pi atthu apale aari owaasomisaaye.

²⁷Khuwaalawana nnyupa aari othukumanaamo atthunkhulu yoori oozeliwe ti nttunkhulu wa mahaakhimu.

²⁸Khuwooza yoori: “Fweeyo khanaawuuziyeni yoori mwihirutele owaasomisa atthu mattakhuzi monkoni wa nzina nttho. Ila mweeyo khusala mwivira mwisomisaka Yeruzaleemu yooshi na olikha toowo mwintakha onilokoveza fweeyo ofwa wa ntthu aya oto.”

²⁹Pheeturu na ashirikhaawe khujipu araka: “Ti yooshapweya yamwanzo onshututela Nnyizinku zayita anaatamu!

³⁰Nnyizinku wa apapa zetthu ansisimula Yinsa nkhapuri, othuuto mweeyo mwankhomeliyeeyo vansalapa khumuula.

³¹Ila Nnyizinku antta phantte ya nkhono-nlume awe khumwinkha ofwalume na khunretta wiiya namusuru yoori atthu a Ezirayeele apatthe othupwiya na opokherele nswammaha wa twampi zaya.

³²Fweeyo n'aamashahiti a vitthu zaya epo, vamote na Rooho Ttakatthiifu, etile Nnyizinku owenkhiyeeyo apale aninshututelaaye.”

³³Paata ya maaswihaapa olupa matthakhuzi apale, yo khwiiya okafilikha khusala atakha owoola.

³⁴Aarivo mfwarizeewu mmote aari wiitthiwaaye Kamaliyeele, aari namanozela wa kano na aari ntthu wooshitahiwa pi atthu a waatta. Ye khulankha khweemela vakatthi wa afwalume apale, khulupa yoori maaswihaapa asuruleliwe vaje khapula vattitthiiru.

³⁵Khuwooza attunkhulu azaawe apa yoori: “Mweeyo atthu a nti ya Ezirayeele, mwiiyane ophoole na vitthu mwintakhaazo owaarettela apo.

³⁶Khwa siikhu ziviriyeezo nyumani aapuweleliye ntthu aari wiitthiwaaye Thewuda aari ojilupezaaye wiiya mfwalume, aarina atthu aari onlottaaye oofiya miiya nne. Aphano ye khuuliwa, atthu awe apale aari onlottaaye khuhiisheli hatha vahali ooshi khumwazeya.

³⁷N'oofwa ye aapuweleliye nkina wa Kalileya aari wiitthiwaaya Yuuda, wakathi atthu aari waatikhiwaayo yoori alawe anthawule mfwalume, oto atthu enkeene aakhupaleliye onlotta, ila na-ye khuuliwa anamalottela awe ooshi khumwazeya.

³⁸Apho, kiniwuuzani yoori atthu apa awiri mwiwaarettele hatha etthu, mwiwaalikhe alawe maana nkhama shawuri za ntthu na khaazi ya ntthu khinrupaza ehiisheeni.

³⁹Ila nkhama ti ya Nnyizinku, mweeyo khaninteela wiishisa, amana mwitakha oretta toowo mwinshittanana Nnyizinku.”

⁴⁰Attunkhulu apale khukhupalela mattakhuzi apale alupiyeeyo Kamaliyeele, khuruma okhuweliwa maaswihaapa apale yoori avire nnyupa, khujaphiwa khuuri yoori ahirutela olaleya hapari za Yinsa, nawiisha khulikhiwa.