Oweziwa wa Yinsa 3:14-25

¹⁴Mweeyo mwankhana vamwantiiwa Nttakatthiifu wa shariya, khuveka yoori afukuliwe namahusuti.

¹⁵Mweeyo khumuula mwennyewe ohaayi, ila Nnyizinku khunsisimula muufwa na fweeyo namashahiti wa vitthu zaya epo.

¹⁶Mwaasa wa waamini nzina la Yinsa, nzina nttiittho lanvonisa mwinyi otu mwinimaanaaye na mwininjuwaaye. Amini entaaye khwa nzina la Yinsa yamwinkha ekumi y'eekhweele, nkhama etthiipo mwinoonaaye mooshi.

¹⁷Aphano attwizaku, miiyo kajuwa yoori mwaarettiye mwihijuwaka ata na anamalokozela enu.

¹⁸Ti nanna yaya Nnyizinku eettettisiyeezo etile aalupiyeeyo awoozaka yoori Al-Masiihu awe aari oteela ohoowa.

¹⁹P'aapho mwithapwiye mwirutele wa Nnyizinku yoori twampi zenu ziiye zooswammihiwa.

²⁰Neekeselaka wakathi woovumula ontaaye wa Mbwana na Al-Masiihu aperekhiweeyo tokhiya asulani aniitthiwaaye Yinsa.

²¹T'iito Yinsa ona ya wiiya pinkuuni mpakha ofiya wakathi Nnyizinku anttelaaye arutisa vitthu zooshi etthiipile Nnyizinku aari olupaazo waaza raku vakatthi wa manapiyu.

²²Munsa khulupa yoori: ‘Mbwana Nnyizinku onlawa anlanse vakatthi wa attwiize napiyu mmote nkhama miiyo; mwinsiileze zooshi anttelaaye owuuzani.

²³Otule ahininsiilezaaye napiyu aya ota antta olaziwavo vakatthi wa atthu awe.’

²⁴W'ookhweele manapiyu ooshi, waaza Samuweele na apale akinoko aya, alaleya vitthu zinrettikanaazo siikhu epi.

²⁵Mweeyo mwaanamarithi wa manapiyu na olapha Nnyizinku alaphaniyeeyo mamarehemu aya, ye aamuuziye Eburahiima yoori: ‘Mwaasa wa peewu yawo atthu ooshi a voolumwenku anttela wiiya aaparikhiyiwa.