Oweziwa wa Yinsa 3:1-18

¹Siikhu moote Pheeturu na Yaahaya eetta owelela nnyupa woosifwiwamo Nnyizinku wakathi woolompa wakathi mittatthu wa makaaripi.

²Aarettiye athuuliwe ntthu aavokoliweeyo ari woorakala eettaniwaka vanlako wa nyuupa yoosifwiwamo Nnyizinku, onittheliwaaye Nlako Wooshapweya, yoori asala awaavekela zimoola atthu apale aari oviramo.

³Amooniyeevo Pheeturu na Yaahaya aviraka nnyupa mphule, khusala awaavekela zimola.

⁴Pheeturu na Yaahaya khusala amweekesa saana khulupa yoori; “Oneekese fweeyo!”

⁵Mwinyi otule khusala aweekesa woophalevo awejelaka opwekherele etthu ya wenkhiwa pi yo.

⁶Pheeturu khulupa yoori: “Akina feeta na tahapu, etthu kiriina ethiito kintta owinkha. Khwa nzina la Yinsa Al-Masiihu Nnazareeti, ettetta!”

⁷Khunkhalela nkhono-nlume awe khusala anshashulela yoori alankhe, nasaapiru moolu na khoza zawe khwiiya za wookowa.

⁸Mwinyi otule khwiirukha khweemela khwaaza weettetta. Khuvira nnyupa woosifwiwamo Nnyizinku vamote na Pheeturu na Yaahaya, eettataka na wiirukha ansifwaraka Nnyizinku.

⁹Wakathi atthu ooshi amooniyeevo eettaka weettetta na ansifwaka Nnyizinku,

¹⁰khunjuwa yoori mwinyi othuutule aari okitirakaaye wiikhala vaNlako Wooshapweya wa nyuupa yoosifwiwamo Nnyizinku khusala alola zimola. Ooshi aya khwiiya ootikinisiwa na oshanka channu wa vitthu zanrettikaneliyeeyo.

¹¹Wakathi mwinyi otule aavoniseweeyo ti Pheeturu na Yaahaya aari owaaperekhaavo. Atthu ooshi khwiiya ootikinisiwa, khusala atthirela attaaphale aarivo Pheeturu na Yaahaya, puuro yaari wiithiwaaye nlako wa Seleyimaana.

¹²Ooniyeevo vitthu epile, Pheeturu khuwaaza yoori: “Meezirayeele mwaasa aya niini mwisutisiwaka pi vitthu epo? Mwaasa aya niini mweeyo mwineekesaka fweeyo nkhama etthu emweettettisiyeeyo mwinyi otu owahi wetthu ama tthakaraka yetthu?

¹³Nnyizinku wa Eburahiima wa Esiyaakha na wa Yaakhumpa, Nnyizinku wa mamarehemu etthu ansifu karumeya awe Yinsa, othuutule mweeyo mwaawenkhiyeeyo atthu yoori amuule na khunkatthala vamote na Ponsiyu Pilatu, ye afilakeleliye onfukula.

¹⁴Mweeyo mwankhana vamwantiiwa Nttakatthiifu wa shariya, khuveka yoori afukuliwe namahusuti.

¹⁵Mweeyo khumuula mwennyewe ohaayi, ila Nnyizinku khunsisimula muufwa na fweeyo namashahiti wa vitthu zaya epo.

¹⁶Mwaasa wa waamini nzina la Yinsa, nzina nttiittho lanvonisa mwinyi otu mwinimaanaaye na mwininjuwaaye. Amini entaaye khwa nzina la Yinsa yamwinkha ekumi y'eekhweele, nkhama etthiipo mwinoonaaye mooshi.

¹⁷Aphano attwizaku, miiyo kajuwa yoori mwaarettiye mwihijuwaka ata na anamalokozela enu.

¹⁸Ti nanna yaya Nnyizinku eettettisiyeezo etile aalupiyeeyo awoozaka yoori Al-Masiihu awe aari oteela ohoowa.