Oweziwa wa Yinsa 1:8-23

⁸Ila mweeyo mwinteela winkhiwa owahi wa Rooho Ttakatthiifu ewiishukelani, mwinteela wiiya mashahiti aka, waaza Yeruzaleemu na Yudeya yooshi, Samariya mpakha ohali wiisheliyeewo olumwenku.”

⁹Paata ya wiisha olupa mattakhuzi apa, khuweziwa pinkuuni, eettaka omweekesesela olawaka khupuwa liwiku khunkutela khuhisala amoona.

¹⁰Yo khusala nalelo ari wookhontola maasho aya enkesaka otulu ye eettaka olawa, khupuwa aluke awiri awaliye kuwo zoolakala,

¹¹khuwooza yoori: “Mweyo akalileya, otulu mwineekesa-niwo? Yinsa alaziweeyo vakatthi venu khuweziwa pinkuuni onteela oruti khwa nanna etthiipile mwimooniyeezo alawaka.”

¹²Aphano maaswihaapa khulankha vamwaako oniitthiwaaye Oluveera oriiyeeyo kharipu na sitati ya Yeruzaleemu.

¹³N'oofiya khuwela nyuupa ya vatulu nhali amakiyeemo, maaswihaapa aya apo aari Pheeturu, Yaahaya, Yaakhumpa na Antere; Filiipe, Tome, Paturumeewu na Mateewuzhu; Yaakhumpa mwaana wa Alufayo, Simawu Zelooti na Yuuda mwaana wa Yaakhumpa.

¹⁴Apo khaazi yaya yaari okhusanyeya na olompa wakhula siikhu, na aakha akinaaya vamote na Mariyamu mamaawe Yinsa na atthwiize.

¹⁵Aphano siikhu moote mamuumini miiya na eeshiriini aakusanyeyiye vahali vamote. Pheeturu khulankha khweemela khulupa awoozaka mamuumini ooshi yoori:

¹⁶“Atthwiizaku, zaarina yoorettikhana zooshi epile Rooho Ttakatthiifu alupeyeezo nkatthi ya nttakhuzi la Nnyizinku khwa Daawuuda monkoni ya Yuuda, othuuto awaalokoziyeeyo atthu olawa onkhola Yinsa.

¹⁷Yuuda aya oto aari wa khuntti yetthu, aari oretta phantte ya khaazi ethiiti.

¹⁸Ila mwaasa wa nzurukhu enkhiweeyo khumuuzanyisa Yinsa, nzurukhu aya khuuzanyela nshapa. Aakhweliye mmashapa mwawe nttumpho khufwa. Erukulu yawe khuphwetuwa marupo awe ooshi khumwazeyela vathi.

¹⁹Atthu ooshi a Yeruzaleemu khujuwa. Apho nshapa ntthile khutthajiwa nzina khwa luuka yaya yo la Akelataama: liriina maana a ‘nshapa la taamu’.

²⁰Nliivuru la Zaburi yaatikhiwamo yoori: ‘Nhali mwawe ethamiwe ahiikhalemo hatha ntthu.’ Khwaatikhiwa theenya yoori ‘khaazi yawe asalane ntthu nkina.’

²¹Apho ninthawula ntthu nkina nintthe nkhuntti mwetthu eeya shaahitiwa osisimuwa wa Mbwana Yinsa. Ila ona ya wiiya ntthu aari onilottakaaye mphule naari ovirakamo Yinsa ari haayi,

²²waaza wakathi opule Yaahaya aari woosavo mpakha siikhu Yinsa alaziweevo vakatthi vetthu aweziwaka pinkuuni.”

²³Aphano, khuthoonyiwa atthu awiri: Yuusufu aarina nzina likina la Barisapa, woojuwaniwa wiiya ntthu wa waaminey, na nlume nkina aari wiitthiwaaye Matiiyasi.