On Lal Solomon 1:1-14

¹Pa inge on ma kato emeet, ma Solomon el orala.

²Nga ke kom in arulana ngokla mutuk; Lungse lom uh los liki na wain uh.

³Oasr foul na keng se keim; Ke pacl inem ac fwack uh, nga sifil pacna esamak foul keng sac. Wangin mutan ku in kutongya lungse la nu sum.

⁴Usyu nga in wi kom, ac kut ac fah kaingla; Kom in tokosra luk ac pwenyuwot nu infukil sum. Kut ac fah tukeni ac arulana engan, Nga yukin lungse lom uh yohk liki kutena ma. Pwaye sin mutan uh in lungse kom!

⁵Mutan Jerusalem, nga ne sroalsroal tuh nga oasku. Nga sroalsroal oana lohm nuknuk in acn mwesis Kedar, Tuh nga kato oana lisrlisr inkul fulat sel Solomon.

⁶Nimet pilesreyu mu nga sroalsroal, Mweyen faht uh pa tuhneyula uh. Tamulel luk elos tuh kasrkusrak sik Ac sap nga orekma ke ima in grape. Na wangin pacl luk in karinginyu sifacna.

⁷Kom su nga lungse yohk, fahkma nu sik, Kom ac pwen un sheep nutum an in mongo oya? Elos ac mongla ya ke pacl faht uh fol ke infulwen len uh? Efu ku ngan suk kom Inmasrlon un sheep nutin mwet shepherd ngia?

⁸Ya kom tia etu acn sac, kom su oasku liki mutan nukewa? Fahla ukweot na un sheep uh Twe konauk acn nani nutum an in mongo we Apkuran nu ke lohm nuknuk sin mwet shepherd ngia.

⁹Kom su nga lungse na pwaye, lumom arulana kato Oana horse mutan ma amakin chariot okoal Tokosra Egypt.

¹⁰Aunsifom oaskulana ke oan likintupom uh, Ac putati sisken kwawom oana wek saok uh.

¹¹Kut ac fah orala soko sein gold ah lom, Ac nawela ke mwe yun silver.

¹²Ke tokosra luk el oan infukil sel, Ono keng keik uh nwakla in lohm uh ke foul wo.

¹³Ke mukul kawuk luk el elongak iniwuk, El oana sie nwana keng orekla ke myrrh.

¹⁴El su saok sik el oana sie ros inima uh Su farngelik inima grape in acn Engedi.