Olcueih 8:1-24

¹Cueihnah loh n'khue moenih a? Lungcuei loh a ol a huel dae ta.

²Longpuei taengkah hmuensang som ah a im kah a hawn ah khaw pai ta.

³Vangpuei la a kun phai kah vongka hmoi ah khaw thohka kah a rhai ah khaw tamhoe ta.

⁴Aw hlang rhoek, nangmih te kang khue tih ka olthang he khaw hlang capa ham ni.

⁵Hlangyoe rhoek loh khinglangnah yakming lamtah aka ang rhoek loh lungbuei te yakming lah.

⁶Hnatun uh, rhaengsang la ka thui dongah ka hmuilai ka ongnah he vanat la om.

⁷Ka ka loh oltak a thuep tih halangnah te ka hmuilai kah a tueilaehkoi ni.

⁸Ka ka dongkah duengnah olthui boeih he a hloo vilvak moenih.

⁹Aka yakming ham tah boeih langya tih mingnah aka dang ham tah thuem ngawn.

¹⁰Ka thuituennah tangka nen pawt tih, mingnah he sui a coelh lakah khaw lo lah.

¹¹Cueihnah tah lungvang lakah then tih ngaihnah sarhui khaw te nen te vanat sak thai pawh.

¹²Kamah tah cueihnah, khinglangnah neh kho ka sak tih thuepnah dongkah mingnah te ka hmuh.

¹³BOEIPA hinyahnah dongah a thae la koevoeinah te thiinah ham ni hoemdamnah neh a thae longpuei khaw, calaak ol khaw ka hmuhuet.

¹⁴Cilsuep neh lungming cueihnah tah kamah taengah, ka yakmingnah neh, kamah ham thayung thamal la om.

¹⁵Kai rhangneh manghai rhoek loh manghai tih boeica rhoek loh duengnah neh a taem uh.

¹⁶Kai rhangneh mangpa rhoek khaw boei uh tih hlangcong boeih loh duengnah lai a tloek uh.

¹⁷Kai aka lung, aka lungnah te ka lungnah tih kai aka toem rhoek loh kai m'hmuh uh.

¹⁸Khuehtawn neh thangpomnah khaw, aka nguel boeirhaeng neh duengnah khaw kamah taengah om.

¹⁹Sui neh suicilh lakah ka thaih then tih ka cangvuei khaw cak lakah cae.

²⁰Duengnah caehlong ah tiktamnah a hawn khui la ka pongpa.

²¹Kai aka lungnah tah ka koe ka pang sak tih a thakvoh te ka koei pah.

²²Daengrhae daengkhoi lamkah a bibi, hlamat kah a longpuei a tongcuek ah BOEIPA loh kai n'lai coeng.

²³Khosuen lamloh, a lu lamloh, diklai khothoeng lamloh kai n'hloe.

²⁴Kai ka poe vaengah tuidung khaw ana om pawh, tuisih tui ana phul pawh.