Olcueih 30:5-31

⁵Pathen kah olthui boeih tah cilpoe la om. Amah dongah aka ying rhoek ham tah photling la a om pah.

⁶A ol te thap boeh, namah te n'tluung vetih na laithae phoe ve.

⁷Namah taeng lamkah te panit ni kam bih. Ka duek hlanah kai taengah hloh boeh.

⁸A poeyoek neh laithae ol tah kai taeng lamloh hla saeh. Kai taengah he khodaeng khaw, khuehtawn khaw m'pae boeh. Ka buhvae dongkah buhham mah kai n'cah mai.

⁹Ka kum vaengah tah ka basa vetih, “BOEIPA te unim,” vik ka ti tholh ve. Ka khawk vaengah ka huen vetih ka Pathen ming te ka pha tholh ve.

¹⁰A boei taeng, a boei taengah sal te thet pah boeh. Namah te thae m'phoei thil vetih, na boe ve.

¹¹A napa kah cadilcahma aka tap loh a manu te khaw a uem noek moenih.

¹²A khawt te sil pawt dae, amah mikhmuh neh aka cim cadilcahma,

¹³A mik neh mat pomsang uh tih, a mikkhu aka huel cadilcahma,

¹⁴A no te cunghang bangla, a pumcu te tumcaca bangla, diklai mangdaeng neh khodaeng hlang aka yoop cadilcahma,

¹⁵Vawt canu rhoi loh, “M'pae, m'pae,” a ti. Pathum khaw cung rhoi pawh. Pali khaw, “Rhoeh coeng,” ti rhoi pawh.

¹⁶Saelkhui neh caya kah a bung, tui aka hah pawh diklai, rhoeh aka ti tlaih pawh hmai pawn ni.

¹⁷A napa aka tamdaeng tih, a manu kah boengainah dongah aka hnoelrhoeng kah a mik tah, soklong vangak loh a koeih vetih atha ca loh a caak ni.

¹⁸Amih pathum mah kai ham tah khobaerhambae coeng dae, a pili phoeikah amih pali he khaw ka ming thai moenih.

¹⁹Vaan ah atha kah longpuei, lungpang dongah rhul kah longpuei, tuitun tuilung kah sangpho longpuei, hula taengkah tongpa longpuei he ni.

²⁰Samphaih nu kah a khosing tah, a caak neh a ka a huih tih, “boethae ka saii pawh,” a ti.

²¹Diklai aka tlai sak pathum neh diklai loh a phueih thai pawh pali tah,

²²Sal te tloep a manghai vaengah, aka ang te buh a hah vaengah,

²³Rhukom te tloep a hmuhuet vaengah, imom loh a boeinu a pang vaengah,

²⁴Amih pali he diklai hmankah a yit koek la om dae cueih rhoela cueih uh.

²⁵Lunghi he a pilnam khaw tlung pawt dae, khohal ah amamih caak te a soepsoei coeng.

²⁶Saphih khaw a pilnam te pilnu pawt dae, thaelpang khuiah a im a khueh.

²⁷Kaisih te manghai tal dae a pum la huek khong uh.

²⁸Imrhai loh kut neh na tuuk mai tih, amah tah manghai kah bawkim ah na om van bal.

²⁹Khokan aka yanghoep pathum neh a caeh aka thuem pali tah amih ni.

³⁰Sathueng tah Rhamsa boeih lakah tlung tih, a mikhmuh kah boeih tah mael tak pawh.

³¹A cinghen aka caplawh maaetal neh manghai amah taengah aka bop rhoek.