Olcueih 23:14-35

¹⁴Nang loh caitueng neh na taam cakhaw, a hinglu ni saelkhui lamkah na huul pah.

¹⁵Ka ca, na lungbuei ni a cueih atah, kai khaw ka lungbuei a kohoe van ni.

¹⁶Ka kuel pataeng sundaep ngawn ni ta, na hmuilai loh vanat la a thui vaengah te.

¹⁷Hlangtholh rhoek taengah na lungbuei te thatlai boel saeh. Tedae BOEIPA mah hnin takuem ah hinyahnah.

¹⁸Khohmai he a om pueng oeh dongah na ngaiuepnah khaw muei mahpawh.

¹⁹Ka ca nang loh hnatun lamtah cueih lah. Te vaengah na lungbuei kah a longpuei khaw uem van saeh.

²⁰Amih yumii taengah, maehkai taengah om boeh.

²¹Yumii neh carhut long tah khodaeng a pang vetih, idut long khaw hnipen ni a bai eh.

²²Nang aka cun na pa ol te hnatun lamtah, na nu khaw a patong vaengah hnoelrhoeng boeh.

²³Oltak he lai lamtah cueihnah, thuituennah, yakmingnah khaw yoi boeh.

²⁴Omngaih coeng, omngaih coeng, hlang dueng aka cun a napa tah omngaih rhoela omngaih coeng. Hlang cueih aka cun khaw a soah coeng.

²⁵Na nu neh na pa te a kohoe saeh lamtah nang aka cun khaw omngaih saeh.

²⁶Ka ca na lungbuei te kamah taengla m'pae. Na mik loh ka longpuei he a ngaingaih la kueinah saeh.

²⁷Pumyoi he vaam a dung, kholong nu khaw tangrhom caek la om.

²⁸Anih khaw dingca bangla rhongngol tih, hlang rhoek taengah hnukpoh la a thap pah.

²⁹Anunae, unim ca te, ngaisahueng la unim ca te, unimca olpungkacan neh hohmuhnah, kohuetnah aka khueh te unim ca? Lungli lungla la tloh aka yook te unim, a mik aka lingduk te unim.

³⁰Misurtui dongah aka bol, yu hoem hamla aka pong dae ni te.

³¹Misurtui te sungsa dongah a thimyum la a lang vaengah, a mikhmuh boengloeng khuiah vanat la a caeh vaengah khaw so boeh.

³²A hmailong ah rhul kah a tuk bangla, rhulthae kah a phuh bangla om ni.

³³Na mik loh a lang la a hmuh vetih, na lungbuei long khaw calaak ol ni a thui eh.

³⁴Tuitun tuilung kah aka yalh bangla, cungkui soi ah aka yalh bangla na om ni.

³⁵Kai he n'taam uh dae a tloh moenih, kai n'thoek uh dae ka yaak moenih. Me vaengah nim ka haenghang vetih a tloe neh ka khoep ham ka hmuh ve,” na ti hae ni.