Olcueih 21:19-26

¹⁹Hohmuhnah, konoinah neh yuu taengah olpungkacan la om lakah tah, khosoek khohmuen ah khosak he then ngai.

²⁰Hlang cueih tolkhoeng kah thakvoh neh situi tah a naikap dae, hlang ang long tah te te a yoop.

²¹Duengnah neh sitlohnah aka hloem long tah, duengnah neh thangpomnah dongkah hingnah te a dang ni.

²²Hlangrhalh rhoek kah khopuei te hlang cueih pakhat long ni a paan tih, a sarhi la a pangtungnah uh khaw a phil pah.

²³A ol a ka aka tuem long tah, a hinglu te citcai khui lamkah a hoep a tlang.

²⁴Thinlen, moemlal, a ming ah hmuiyoi long tah, thinpom althanah neh a saii.

²⁵A kut loh a saii ham a aal dongah kolhnaw kah hoehhamnah loh amah a duek sak ni.

²⁶Hnin takuem ah hoehhamnah te a ngaidam dae, aka dueng long tah a paek phoeiah khaw a hnaih moneih.