Olcueih 18:6-19

⁶Hlang ang kah hmuilai tah tuituknah ham ha pawk uh tih, a bohnah te a ka loh a khue.

⁷Hlang ang kah a ka tah amah kah porhaknah neh a hmuilai te a hinglu ham hlaeh la om.

⁸Thet ol he didii bangla om tih, a bung khui la tluektluek kun.

⁹A bibi dongah aka uelh khaw kutpo boei kah a manuca la om.

¹⁰BOEIPA ming tah sarhi ham rhaltoengim ni, hlang dueng tah a taengla yong tih a hoep a tlang.

¹¹Hlanglen kah a boeirhaeng tah amah ham sarhi aka tak khorha la om tih, a ngaihlih vaengah vongtung tluk a sang sak.

¹²Hlang he lungbuei aka sang taengah pocinah a lamhma tih, kodonah taengah thangpomnah a lamhma pah.

¹³A hnatun hlan ah ol aka thuung tah anglat ni. Amah khaw te nen te mingthae a phueih.

¹⁴Hlang he a tlohtat vaengah a mueihla loh a cangbam dae, mueihla a rhawp te u long a khoeng eh?

¹⁵Aka yakming kah lungbuei loh mingnah a lai tih aka cueih a hna loh mingnah a tlap.

¹⁶Hlang kah kutdoe he amah ham long a khui sak pah tih, amah te tanglue kah mikhmuh ah a mawt.

¹⁷A hui te ha pawk la ha pawk hlan tih amah a khe hlan atah, amah kah tuituknah dongah lamhma la aka dueng khaw om.

¹⁸Hohmuhnah te hmulung loh a paa sak tih, aka tlung rhoi khaw rhak a phih.

¹⁹Boekoek boeina tah sarhi aka tak khorha lakah olpungkacan la om tih, hohmuhnah khaw impuei thohkalh bangla om.