8Yu pudum ola nogudbalawei blanga melabat lida langa yu, en ola nogudbala ting weya melabat bin dum sigridwei yu gin luk.
9Jis laik wen sambodi opinim en jadimap ai kwikbala, en lagijat du melabat laif binij kwikbala wen yu gitwail.
10Melabat laif maitbi jidan oni 70 yiya o maitbi 80 yiya if wi jidan strongbala, bat stil melabat abum loda trabul en soriwan filing langa ol detlot yiya. Detlot yiya binij kwikbala en wi binijap en wi gon.
11Nobodi sabi det brabliwan pawa wen yu gitwail langa det nogudbalawei blanga pipul. Blanga tharran na melabat garra bradin en rispek yu olataim.
12Yu lenim melabat hau det laif blanga melabat im shotwan, wulijim melabat garra jinggabat brabli gudwei.
13Haulong mowa yu garra jidan wail lagijat? YAWEI, yu sori langa yu wekinmen olabat.
14Bilimap melabat ebri moning garram det filing blanga yu blanga laigim yu, wulijim melabat garra sing en jidan gudbinji langa melabat laif olataim.
15YAWEI, yu gibit melabat detmatj filing blanga jidan gudbinjiwei na blanga ola yiya weya melabat bin jidan nogudbinjiwei.
16Yu larram melabat yu wekinmen olabat, luk ola brabli haibala ting yu dum. Yu larram melabat biginini olabat hu garra jidan bambai luk yu brabli haibalawan pawa.
17YAWEI, melabat God, larram yu kainbala filing jidan garram melabat. Yu meigim ebrijing melabat wandi dum hepin gudbalawei.
Ola Saam 90
Ola Saam 90:8-17