Ola Saam 83:8-15

⁸Detlot pipul brom det kantri Asiriya bin joinap garram olabat du. Olabat bin jidan brabli gud fren blanga album ol detlot Eman pipul, en ol detlot Moweb pipul hubin brom det femili lain blanga det men neim Lot.

⁹God, yu panishim olabat seimwei jis laik yubin dum langa ola Midiyan pipul. Yu binijimap olabat jis laik yubin binijimap Sisera en im king Jeibin, deya langa det Kishan Riba,

¹⁰gulijap langa det taun gulum Endowa. Deya na yubin bidim olabat en olabat bodi bin jidan nogudwan langa graun.

¹¹Yu bidim ola boswan blanga olabat jis laik yubin dum langa Oreb en Sib en langa Seba en Seilmuna.

¹²Olabat na bin tok, “Nomeda det kantri blanga God, melabat garra teikoba en meigim im blanga melabat ronwan kantri na.”

¹³God, yu spredimat olabat jis laiga das, en jis laiga draiwan gras weya det win oldei blowimweibat.

¹⁴Jis laik faiya wen im barnimap ola tri, en jis laik lilwan faiya wen im stadimap bigwan faiya langa ola hil,

¹⁵wal yu andimwei olabat garram yu strongwan win, en yu meigim olabat bradin garram yu jigiwan win en laitining.