Ola Saam 83:2-11

²Yu luk detlot hu nomo laigim yu! Yu enami olabat gidap redi blanga fait.

³Olabat meigimbat ola sigridwan plen blanga yu pipul. Olabat toktokbat blanga dum nogud ting langa yu pipul hu yu laigim brabliwei en yu oldei lukaftumbat.

⁴Olabat tok, “Kaman. Wi garra binijimap olabat wulijim nobodi kaan jinggabat detlot Isreil pipul enimo.”

⁵Olabat ol agri gija blanga olabat plen, en blanga fait langa yu.

⁶Dislot pipul brom ol dislot traib na bin meigim dijan plen. Ola pipul brom Idam, en ola Ishmeil pipul, en ola pipul brom Moweb en ol detlot Heigrait pipul,

⁷en ol detlot pipul brom det kantri Gebal, en ola Eman pipul en ola Amalek pipul, en ol detlot pipul brom Filistiya en brom Taya.

⁸Detlot pipul brom det kantri Asiriya bin joinap garram olabat du. Olabat bin jidan brabli gud fren blanga album ol detlot Eman pipul, en ol detlot Moweb pipul hubin brom det femili lain blanga det men neim Lot.

⁹God, yu panishim olabat seimwei jis laik yubin dum langa ola Midiyan pipul. Yu binijimap olabat jis laik yubin binijimap Sisera en im king Jeibin, deya langa det Kishan Riba,

¹⁰gulijap langa det taun gulum Endowa. Deya na yubin bidim olabat en olabat bodi bin jidan nogudwan langa graun.

¹¹Yu bidim ola boswan blanga olabat jis laik yubin dum langa Oreb en Sib en langa Seba en Seilmuna.