Ola Saam 78:35-57

³⁵Deibin sabi det boswan God na bin oldei maindimbat olabat, en imbin oldei albumbat en seibum olabat.

³⁶Bat ola wed deibin oldei tok bin laiyawan. Ebrijing weya deibin toktok nomo bin trubala.

³⁷Dei nomo bin gibit God rispek. Olabat nomo bin kipum olabat strongwan pramis langa im.

³⁸Bat God bin sori langa im pipul olabat. Imbin larramgo olabat fri brom olabat nogudbalawei en im nomo bin binijimap olabat. Lodataim God bin oldei holdimbek miselp en nomo gitwail langa olabat.

³⁹Imbin sabi deibin oni pipul weya garra dai, jis laik win weya kaman en binij kwikbala.

⁴⁰Lodataim deibin gibit im bekboun. Detmatj taim deibin oldei meigim im fil nogudbinji.

⁴¹Oba en oba deibin oldei testimbat God, en deibin oldei ardimbat det filing blanga im na, det brabli holiwan God blanga Isreil.

⁴²Deibin fogedabat im strongwan pawa, en det dei wen imbin seibum olabat brom olabat enamimob,

⁴³en wen imbin shoum ola klebabala ting imbin dum langa Sowan deya langa det kantri Ijip.

⁴⁴Imbin tjeinjim ola riba woda en meigim blad, en detlot pipul langa Ijip nomo bin abum eni woda blanga dringgim na.

⁴⁵Imbin jandim loda flai langa olabat weya bin ardimbat olabat, en ola frog bin meigim olabat kantri nogudwan.

⁴⁶Imbin jandim ola bigwan grashopa blanga dagat olabat gadin, en binijimap ola daga weya bin gro langa olabat fam.

⁴⁷Imbin meigim dai ola greiptri blanga olabat garram ola heilston, en imbin meigim dai ola figtri blanga olabat garram brabli kolwanwetha.

⁴⁸Imbin kilim ded ola buligi blanga olabat garram heilston, en ola ship blanga olabat garram laitining.

⁴⁹Imbin meigim olabat abum detmatj wori wen imbin brabli wail nomo lilbit langa olabat, en imbin jandim detlot speshalwan einjul langa olabat blanga kilim olabat ded.

⁵⁰Im nomo bin holdimbek miselp wen imbin wail langa olabat en im nomo bin sori langa olabat du. Imbin kilim olabat holot garram nogudwan siknis.

⁵¹Imbin kilim ded ola boi hubin bon fes blanga ola femili langa Ijip.

⁵²Brom deya imbin deigim im pipul olabat jis laiga stakmen en imbin deigim olabat thru det deset kantri.

⁵³Imbin lidim olabat seifwei en olabat nomo bin bradin, bat det solwoda bin gaburrumap olabat enamimob.

⁵⁴Imbin bringimap olabat langa im seikridwan kantri, en langa detlot bigwan hil weya imbin teikoba.

⁵⁵Imbin andimwei detlot pipul hubin oldei jidanabat langa det kantri wen im pipulmob bin go thru deya. Imbin kadimat olabat kantri en gibit miselpmiselp langa ola klen blanga Isreil, en imbin gibit ola kemp blanga olabat langa im pipul olabat.

⁵⁶Bat olabat nomo bin irrim langa det Boswan God en deibin testimbat im. Olabat nomo bin teiknodis langa ol im lowa.

⁵⁷Olabat bin gibit bekboun langa im en dei nomo bin jidan trubala langa im, laik olabat grengrenfatha bin dumbat longtaim bifo. Olabat bin nogud jis laik bendiwan spiya.