Ola Saam 78:3-11

³ola ting na wibin sabi en irrimbat brom wi dedimob.

⁴Wi garra dalimbat wi bigininimob en blanga olabat bigininimob blanga det pawa blanga YAWEI, en blanga ola haibala en ola gudwan ting imbin dum. Wi kaan blandim ol detlot stori brom olabat.

⁵Imbin gibit ola lowa langa ola Isreil pipul hubin kaman brom olabat grengrenfatha Jeikob. Imbin dalim wi femili olabat hubin jidan longtaim blanga titjimbat olabat bigininimob blanga ol im lowa,

⁶wulijim detlot bigininimob hu garra jidan bambai gin sabi, en olabat gin dalimbat olabat bigininimob du.

⁷Wen dei lagijat dei garra trastimbat God du, en nomo fogedabat wanim imbin dum, en oldei teiknodis langa ol im lowa.

⁸Olabat kaan jidan wulijim olabat grengrenfathamob hubin jidan brabli nogudbala en nomo garram irriwol. Olabat nomo bin trastim God strongbalawei, en dei nomo bin jidan trubalawei langa im.

⁹Detlot pipul brom Ifreiyim bin abum bo en erro redibala, bat olabat bin ranawei wen det dei blanga det wofait bin kaman.

¹⁰Olabat nomo bin kipum det strongwan pramis blanga olabat langa God. Dei nomo bin wandi teiknodis langa im lowa.

¹¹Deibin fogedabat wanim imbin dum, ol detlot klebabala ting weya deibin luk imbin dumbat.