Ola Saam 77:8-20

⁸Maitbi imbin stap laigimbat wi? Maitbi im garra stapam det pramis weya imbin meigim longtaim?

⁹Maitbi imbin kipumbek det kainbala filing blanga im dumaji im wail langa wi?”

¹⁰Afta na aibin tok miselp, “Dijan na meigim mi brabli nogudbinji. God bin abum detmatj pawa basdam, bat tudei na ai nomo luk im pawa.”

¹¹YAWEI, ai garra jinggabat blanga ola haibala ting yubin oldei dumbat. Ai garra jinggabat ol detlot ting yubin oldei dumbat garram yu strongbalawan pawa longtaim.

¹²Ai garra jinggabat ebrijing yubin oldei dum. Ai garra jinggabat olataim blanga ebrijing yubin oldei dumbat garram yu strongbalawan pawa.

¹³Det wei blanga yu main God im holiwan. Nomo eni drimin brabli haibalawan wulijim yu.

¹⁴Yu na det God hu oldei dum olkain ting garram yu pawa. Yu na shoum yu pawa langa ola pipul langa ebri kantri.

¹⁵Garram yu pawa yubin seibum ol yu pipul olabat, detlot bigininimob blanga Jeikob en Josef.

¹⁶God, wen ola woda bin luk yu deibin ol bradin, en ebrijing weya jidan insaid langa det solwoda bin sheik nomo lilbit.

¹⁷Ola klaud bin meigim rein buldan, en thanda bin meigim nois brom skai en laitining bin laitlaitbat brom ebri said.

¹⁸Det nois blanga yu thanda bin jidan langa det wiliwili, en det lait brom yu laitining bin laitimap dijan wel. Dijan wel bin sheiksheik nomo lilbit.

¹⁹Yubin wok rait thru det solwoda. Yubin krosim det dipwan solwoda. Bat nobodi bin luk yu trek.

²⁰God, yubin lidim yu pipul olabat jis laiga stakmen wen yubin pikimat Mosis en Eran blanga lidimbat yu pipul olabat.