Ola Saam 73:6-27

⁶Ebridei olabat jidan brabli praudbala, en ebridei olabat oldei faitabat jis laik ebridei dei werrimon klos.

⁷Brom insaid olabat adwan hat ol detlot nogudwan ting kamat, en olabat oldei jinggabat nogudwan ting olataim.

⁸Olabat oldei laflafbat en toktok nogudwei blanga pipul. Dei jidan praudbala en dei oldei meigimbat plen blanga ardimbat najalot pipul.

⁹Olabat tok nogudbalawei blanga YAWEI hu jidan deya langa hebin. En olabat oldei bosobabat ebribodi iya langa graun,

¹⁰en ola pipul blanga YAWEI bin bulurrum olabat, en bilib wanim olabat bin tok.

¹¹Olabat oldei tok, “YAWEI det Haibalawan God nomo sabi enijing en im kaan faindat wanim wi dumbat.”

¹²Lagijat na ola nogudbala pipul jidan. Olabat oldei abum blendibala ting, en dei gedimbat mowa en mowa enijing weya dei oldei wandimbat.

¹³Maitbi fo najing aibin kipum miselp klinbala en nomo bin dumbat ola nogudwan ting.

¹⁴God, yubin meigim mi abumbat det pein oldei, en ebri ailibala yubin oldei panishimbat mi.

¹⁵If ai bina tok ola nogudbala ting, wal ai nomo bina jidan laik yu pipul olabat.

¹⁶Aibin trai jinggabat blanga sabi ebrijing blanga ola gudbala pipul en ola brabli nogudbala pipul, bat najing. Imbin brabli adwan.

¹⁷Bat wen aibin go langa yu Serramoni Pleis, deya na aibin sabi wanim garra hepin langa ol detlot brabli nogudbala pipul.

¹⁸Yu na YAWEI garra meigim olabat buldan en olabat garra ol binijap.

¹⁹Streidawei olabat garra binij. Olabat kaan dai gudwei.

²⁰Olabat jidan jis laiga drim weya gowei wen yu gidap ailibala. YAWEI wen yu gidap, olabat binij du, jis laik det drim.

²¹Wen aibin oldei jinggabat ola nogud ting, en aibin oldei ardimbat,

²²aibin jidan brabli siliwan wulijim wailwan enimul. Ai nomo bin sabi langa yu.

²³Bat stil aibin jidan gulijap langa yu, en yu holdim main bingga.

²⁴Yu shoumbat mi wujei blanga go garram yu wed, en bambai yu garra welkam mi deya weya yu jidan garram yu pawa en shainiwan lait.

²⁵YAWEI, oni yu na ai garram deya ontop langa hebin. Dumaji ai garram yu, ai kaan wandim enijing langa dijan kantri na.

²⁶Maitbi main bodi en main garra jidan wikwan, bat yu na God meigim mi jidan strongbala, en oni yu na mi wandim olagijawan.

²⁷Ol detlot pipul hu gibit bekboun langa yu garra binijap. Yu garra binijimap ol detlot hu nomo jidan trubalawei langa yu.