Ola Saam 72:5-20

⁵Meigim det king jidan laibala olataim, jis laik det san shain olataim, en det mun gibit lait olataim.

⁶Meigim det king jidan jis laik rein weya meigim ebrijing gudwan langa dijan kantri.

⁷Meigim det king jidan det raitwei langa im laif olataim, wulijim ola pipul garra jidan gudbinjiwei garram ebrijing olagijawan.

⁸Larram im jidan bos blanga ola kantri brom wan solwoda raidap langa najawan solwoda, en brom det Yufreitis Riba raidap najasaid langa dijan wel.

⁹Detlot pipul hu jidan langa drai kantri garra nildan lida langa im, en im enami olabat garra tjakam miselp feisdan langa graun.

¹⁰Ola king brom Tashish en brom ola ailin kantri garra gibitbat presen langa im. Detlot king brom Shiba en Seba garra bringimap ola ofring langa im du.

¹¹Meigim ola king nildan lida langa im, en ola pipul brom ebri kantri garra wek blanga im.

¹²Im seibum ola powan pipul wen olabat jingat langa im, en ol detlot du hu nomo garram enijing en detlot weya nobodi album olabat.

¹³Im garram soriwan filing blanga ola wikwan en ola powan pipul, en im seibum detlot laif blanga ol detlot hu nomo garram enibodi blanga albumbat olabat.

¹⁴Im seibum olabat brom abumbat adtaim en brom faitfaitbat, dumaji olabat laif jidan speshalwan langa im.

¹⁵Trubala, longtaim im garra jidan king! Larram detlot pipul brom Shiba gibit im gol. Larram ola pipul prei blanga im olataim. Larram God jidan gudbala langa im olataim.

¹⁶Larram ola sid daga jidan detmatj langa det kantri. Larram ola hil kantri jidan garram detmatj daga, jis laik Lebanan garram detmatj. Larram ola taun jidan garram detmatj pipul, jis laik ola fam kantri jidan garram detmatj gras.

¹⁷Larram pipul jinggabat det neim blanga det king olagijawan, en nomo fogedabat im. Larram pipul ebriweya sabi blanga im raidap det taim weya det san kaan gibit lait enimo. Larram pipul langa ebri kantri askim God blanga jidan gudbalawei langa olabat, seimwei laik imbin gudbala langa det king.

¹⁸Preisim YAWEI det God blanga Isreil! Oni im na oldei dumbat ola gudwan ting.

¹⁹Preisim im haibala neim olagijawan. Larram ola pipul ebriweya sabi det haibalawei blanga im. Yuwai! Trubala!

²⁰Dijan na det laswanpat blanga ola preya weya Deibid det san blanga Jesi bin prei.