Ola Saam 71:19-24

¹⁹Blanga yu raitwei im gajimap det skai. Yubin dum loda haibalawan ting. Nobodi jidan wulijim yu, najing.

²⁰Yubin meigim trabul kaman langa mi en aibin ardim, bat yu garra meigim mi strongbala igin. Yu kaan larram mi go langa greibyad.

²¹Yu garra meigim mi jidan mowa haibalawan igin. Yu garra meigim mi jidan gudbinjiwei igin.

²²Ai garra preisim yu garram gita. Blanga det trubalawei blanga yu ai garra preisim yu, main God. Garram main gita ai garra plei ola song langa yu, det holiwan God blanga Isreil.

²³Ai garra jingat gudbinjiwei wen mi preisim yu. Brabliwei na ai garra sing dumaji yubin baiyimbek mi.

²⁴Oldei ai garra tokabat blanga det raitwei blanga yu, dumaji ol detlot hubin wandim trai kilim mi, dei nomo bin win en dei jidan brabli sheim na.