Text copied!
CopyCompare
Holi Baibul - Ola Saam - Ola Saam 69

Ola Saam 69:4-32

Help us?
Click on verse(s) to share them!
4Detlot pipul hu nomo laigimbat mi fo najing, olabat jidan detmatj na, mowa den ol main heya langa main hed. Main enami olabat oldei dalimbat laiya stori blanga mi. Olabat strongbala en dei wandi kilim mi ded. Deibin meigim mi gibit ola ebrijing langa olabat weya ai nomo bin stilim.
5God, ai kaan haidim ol main nogudbalawei brom yu. Yu sabi wen mi jidan nogudbala.
6Yu na YAWEI, det Brabli Boswan God. Nomo larram mi meigim sheim langa ol detlot hu trastim yu. God blanga Isreil, nomo larram mi meigim sheim langa detlot hu weship yu.
7Blanga yu na najalot pipul bin meigim fan langa mi, en mi jidan garram sheim brabliwei na.
8Mi wulijim streinja langa main femilimob. Langa main femilimob mi jis laik brom najawan kantri.
9Mi laigim det Serramoni Pleis blanga yu brabliwei. Main filing insaid im barn wulijim faiya. Wen pipul tok nogudwan wed langa yu, im meigim mi nogud du.
10Wen ai nomo dagat daga blanga meigim miselp lobala, pipul tokabat nogudwei langa mi.
11Wen mi werrimon sekbeigwan klos blanga jidan soribalawei, olabat laf langa mi.
12Olabat tokabat mi ebriweya langa roud, en drangginwan pipul meigimap song blanga mi.
13Bat mi, ai garra prei langa yu, YAWEI. God, langa yu ron taim yu ensim mi. Yu ensim mi, dumaji yu garram bigwan filing blanga laigim pipul brabliwei, en dumaji yu oldei kipum blanga yu pramis blanga seibumbat pipul.
14Seibum mi God. Pulumat mi brom det mad. Nomo larram mi sinkdan. Kipum mi seif brom main enami olabat. Seibum mi brom det dipwan woda.
15Nomo larram fladwoda gaburrumap mi, en nomo larram mi draun, en nomo larram mi godan langa greib.
16Ensim mi YAWEI, dumaji yu na brabli gudwan en yu kipgon laigimbat mi detmatj. Dumaji yu brabli kainbala, wal yu kaman langa mi.
17Nomo haidim miselp brom mi, yu wekinmen. Ai garram bigwan trabul. Yu ensim mi na.
18Kaman langa mi en seibum mi. Seibum mi brom main enami olabat.
19Yu sabi hau ai oldei abum adtaim, en hau mi jidan garram sheim, en nomo garram eni rispek. Yu gin luk ol main enami olabat.
20Det nogudwan wed bin meigim mi nogudbinji en ai kaan dum enijing na. Aibin wandim pipul blanga sori langa mi, bat najing. Aibin wandim pipul blanga kaman langa mi blanga meigim mi gudbinji, bat najing.
21Wen aibin hanggri deibin gibit mi poisinwan bif. Wen aibin thesti deibin gibit mi biniga.
22Meigim olabat seikridwan padi panishim olabat gin. En meigim olabat jidan nomo garram enijing.
23Meigim olabat blainwan, en meigim olabat garrimap hebiwan loud olagijawan.
24Gitwail en ranimap olabat raidap yu gajim olabat. Dumaji yu wail langa olabat, wal yu panishim olabat.
25Meigim olabat kemp jidan emtiwan. Nomo larram enibodi jidan laibala langa olabat kemp.
26Olabat mokimbat ol detlot pipul weya yubin panishim. Olabat tokabat blanga detlot pipul weya jidan garram detmatj pein dumaji yubin panishim.
27Yu raidimdan ola nogud ting weya dei dumbat. Nomo larram olabat joinin garram detlot pipul weya yubin meigim jidan fri.
28Rabumat olabat neim brom det speshalwan buk blanga laif. Nomo larram olabat neim jidan garram ola neim blanga yu pipul olabat.
29Bat mi ardim en ai nomo sabi wanim ai garra dum. Yu lidimap mi God, en seibum mi.
30Ai garra preisim God garram song. Ai garra tokabat blanga det haibalawei blanga im en gibit im theingks.
31Tharran na garra meigim YAWEI jidan mowa gudbinji, mowa den det buligi ofring. Nomeda if yu sekrifais brabli bigwan bul garram bigwan hon, im stil najing tharran.
32Wen ol detlot pipul hu abumbat adtaim luk dijan, dei garra gudbinji. Detlot hu weshipbat God garra jidan mowa strongbala.

Read Ola Saam 69Ola Saam 69
Compare Ola Saam 69:4-32Ola Saam 69:4-32