Text copied!
CopyCompare
Holi Baibul - Ola Saam - Ola Saam 69

Ola Saam 69:23-36

Help us?
Click on verse(s) to share them!
23Meigim olabat blainwan, en meigim olabat garrimap hebiwan loud olagijawan.
24Gitwail en ranimap olabat raidap yu gajim olabat. Dumaji yu wail langa olabat, wal yu panishim olabat.
25Meigim olabat kemp jidan emtiwan. Nomo larram enibodi jidan laibala langa olabat kemp.
26Olabat mokimbat ol detlot pipul weya yubin panishim. Olabat tokabat blanga detlot pipul weya jidan garram detmatj pein dumaji yubin panishim.
27Yu raidimdan ola nogud ting weya dei dumbat. Nomo larram olabat joinin garram detlot pipul weya yubin meigim jidan fri.
28Rabumat olabat neim brom det speshalwan buk blanga laif. Nomo larram olabat neim jidan garram ola neim blanga yu pipul olabat.
29Bat mi ardim en ai nomo sabi wanim ai garra dum. Yu lidimap mi God, en seibum mi.
30Ai garra preisim God garram song. Ai garra tokabat blanga det haibalawei blanga im en gibit im theingks.
31Tharran na garra meigim YAWEI jidan mowa gudbinji, mowa den det buligi ofring. Nomeda if yu sekrifais brabli bigwan bul garram bigwan hon, im stil najing tharran.
32Wen ol detlot pipul hu abumbat adtaim luk dijan, dei garra gudbinji. Detlot hu weshipbat God garra jidan mowa strongbala.
33YAWEI im lisin langa ol detlot pipul hu nomo garram enijing, en im nomo fogedabat im pipul olabat hu oldei jidan prisana.
34Ebrijing langa skai en graun, preisim God. Ola solwoda en ola enimul langa solwoda preisim im du.
35Im garra seibum Jerusalem en bildimap ola taun langa Juda igin. Im pipul olabat garra jidan deya igin.
36Detlot bambaiwan femilimob blanga detlot pipul hu teiknodis en duwit langa im garra teikoba en abum det kantri, ol detlot na hu laigim im garra jidan deya.

Read Ola Saam 69Ola Saam 69
Compare Ola Saam 69:23-36Ola Saam 69:23-36