Ola Saam 69:18-35

¹⁸Kaman langa mi en seibum mi. Seibum mi brom main enami olabat.

¹⁹Yu sabi hau ai oldei abum adtaim, en hau mi jidan garram sheim, en nomo garram eni rispek. Yu gin luk ol main enami olabat.

²⁰Det nogudwan wed bin meigim mi nogudbinji en ai kaan dum enijing na. Aibin wandim pipul blanga sori langa mi, bat najing. Aibin wandim pipul blanga kaman langa mi blanga meigim mi gudbinji, bat najing.

²¹Wen aibin hanggri deibin gibit mi poisinwan bif. Wen aibin thesti deibin gibit mi biniga.

²²Meigim olabat seikridwan padi panishim olabat gin. En meigim olabat jidan nomo garram enijing.

²³Meigim olabat blainwan, en meigim olabat garrimap hebiwan loud olagijawan.

²⁴Gitwail en ranimap olabat raidap yu gajim olabat. Dumaji yu wail langa olabat, wal yu panishim olabat.

²⁵Meigim olabat kemp jidan emtiwan. Nomo larram enibodi jidan laibala langa olabat kemp.

²⁶Olabat mokimbat ol detlot pipul weya yubin panishim. Olabat tokabat blanga detlot pipul weya jidan garram detmatj pein dumaji yubin panishim.

²⁷Yu raidimdan ola nogud ting weya dei dumbat. Nomo larram olabat joinin garram detlot pipul weya yubin meigim jidan fri.

²⁸Rabumat olabat neim brom det speshalwan buk blanga laif. Nomo larram olabat neim jidan garram ola neim blanga yu pipul olabat.

²⁹Bat mi ardim en ai nomo sabi wanim ai garra dum. Yu lidimap mi God, en seibum mi.

³⁰Ai garra preisim God garram song. Ai garra tokabat blanga det haibalawei blanga im en gibit im theingks.

³¹Tharran na garra meigim YAWEI jidan mowa gudbinji, mowa den det buligi ofring. Nomeda if yu sekrifais brabli bigwan bul garram bigwan hon, im stil najing tharran.

³²Wen ol detlot pipul hu abumbat adtaim luk dijan, dei garra gudbinji. Detlot hu weshipbat God garra jidan mowa strongbala.

³³YAWEI im lisin langa ol detlot pipul hu nomo garram enijing, en im nomo fogedabat im pipul olabat hu oldei jidan prisana.

³⁴Ebrijing langa skai en graun, preisim God. Ola solwoda en ola enimul langa solwoda preisim im du.

³⁵Im garra seibum Jerusalem en bildimap ola taun langa Juda igin. Im pipul olabat garra jidan deya igin.