Ola Saam 68:6-16

⁶Im gibit kemp langa pipul hu nomo garram femili, en meigim ola prisana jidan gudbinji en fri. Bat pipul hu laigim faidabat garra jidan langa kantri weya nomo garram enijing.

⁷God, wen yubin deigimat yu pipul olabat brom Ijip, en yubin go lida langa olabat deya langa det deset kantri,

⁸det graun bin sheik en rein bin buldan, dumaji yu na God, det God hubin tok langa Sainai, en yu na det God blanga ola Isreil pipul.

⁹Yubin meigim detmatj rein kaman en meigim det drai kantri gudwan igin.

¹⁰Yu pipul olabat bin meigim olabat kemp deya na, en garram yu gudwan filing yubin album ola powan pipul.

¹¹Bos, yubin gibit wed en loda wuman bin deigim dijan nyus ebriweya,

¹²“Ola boswan en olabat amimob ranaweibat na!” Lagijat na deibin tok. Ol detlot wuman hubin stap langa kemp en maindimbat ola ship bin kadimat miselp ebrijing weya deibin gedim langa det wofait.

¹³Deibin gedimbat detmatj silba en gol, en olabat bin jidan purdiwan jis laiga purdiwan bard.

¹⁴Wen God det brabli boswan bin andimwei ola king langa det bigwan hil gulum Seilman, imbin meigim sno buldan deya.

¹⁵Beishan im brabli bigwan hil. Im jandap garram loda haiwan haiwan hil.

¹⁶Beishan, wotfo yu jidan jelas langa det hil gulum Saiyan weya God bin pikimat blanga jidan? YAWEI det trubala God garra jidan deya olagijawan na.