Ola Saam 68:16-26

¹⁶Beishan, wotfo yu jidan jelas langa det hil gulum Saiyan weya God bin pikimat blanga jidan? YAWEI det trubala God garra jidan deya olagijawan na.

¹⁷YAWEI bin kaman brom Sainai blanga go langa det seikridwan haus langa Saiyan. Imbin kaman garram detmatj hos en bagi yu kaan adli kaundimap olabat, jis laik ola lif langa tri.

¹⁸Imbin gowap langa det haibalawan hil gulum Saiyan, en imbin deigim loda prisana garram im du. Ola pipul bin gibit im gudwan ting, en detlot nogudbala pipul hubin gibit bekboun langa im bin gibit im gudwan ting du. YAWEI det trubala God garra jidan deya na.

¹⁹Wi garra preisim det Bos hu oldei garrimap wi trabul ebridei. Im na det God hu oldei seibum wi.

²⁰Det God blanga wi na im det God hu oldei seibum wi. Im na YAWEI det trubala God, wi Bos. Im na seibumbat wi brom daidaibat.

²¹God na garra breigimap ola hedpat blanga im enami olabat, ol detlot na hu kipgon dumbat ola nogudbala ting.

²²Det Bos bin tok, “Ai garra bringimbek yu enami olabat brom det hil kantri gulum Beishan. En ai garra bringimbek olabat brom det dipwan solwoda,

²³wulijim yumob garra wok langa olabat blad, en ola dog blanga yumob gin dagadagat haumatj dei wandim.”

²⁴Main God, yubin win, en ebribodi bin luk yubin go lida langa yu brabli seikridwan pleis.

²⁵Ola singa bin go lida, en detlot hubin plei myusik bin kaman biyain, en langa midul ola yanggel bin hitimbat ola lilwan dram.

²⁶Wen ol im pipul olabat midap olabat tok, “Preisim God. Preisim YAWEI ol yumob femili blanga Jeikob.”