Ola Saam 66:2-13

²Sing blanga preisim im haibala neim. Preisim im brabliwei.

³Tok langa God, “Yu dumbat ola brabli gudwan ting. Blanga yu pawa im brabli strongbalawan, en yu enami olabat brabli bradin blanga yu en baudan lida langa yu.

⁴Ebribodi langa dijan wel weship langa yu. Olabat preisim yu. Olabat sing ola preis song langa yu neim.”

⁵Kaman en luk wanim God bin dum. Imbin dum ola brabli gudwan ting blanga pipul.

⁶Imbin meigim det solwoda jidan drai graun. Wi femilimob hubin jidan bifo bin krosoba langa det riba garram fut. Deya na, wibin jingat gudbinjiwei blanga wanim imbin dum.

⁷Garram im strongbala pawa im jidan bos olagijawan, en im wotjimbat pipul langa ola kantri. Nomo gibit bekboun langa YAWEI.

⁸Ola pipul brom ebri kantri preisim wi God. Larram ebribodi irrim det preis.

⁹Im nomo bin larram wi dai, en im nomo bin larram wi buldan.

¹⁰God, yubin testimbat melabat wulijim silba wen im barn langa faiya blanga klinimat det rabish pat. Wal lagijat na yubin testim melabat.

¹¹Yubin larram melabat abum loda trabul jis laik melabat bin buldan insaid langa trep, en jis laik yubin meigim melabat garrimap hebiwan loud langa bekboun.

¹²Yubin larram melabat enami olabat jidan krulbala bos langa melabat, jis laik deibin ranimdan melabat garram olabat hosis en bagi. Melabat bin abum brabli adtaim, jis laik wen faiya o fladwoda binijimap ebrijing blanga pipul. Bat yu na bin bringimap melabat langa seifwan pleis garram detmatj daga.

¹³Ai garra deigim detlot barnapwan ofring langa yu serramoni pleis. Ai garra gibit yu wanim aibin pramisim wen aibin abumbat trabul.