Ola Saam 63:3-11

³God, blanga yu filing im kipgon laigimbat mi. Im mobedawan langa main laif. Blanga tharran na ai garra preisim yu.

⁴Ai garra oldei gibit yu theingks raidap mi dai. Ai garra lidimap main bingga langa yu wen mi prei.

⁵Main spirit garra jidan bulap en sedisfaid jis laik aibin dagat detmatj daga. Ai garra sing ola hepiwan song blanga preisim yu.

⁶Naitaim wen mi leidan mi oldei jinggabat langa yu, en olnait mi jinggabat langa yu,

⁷dumaji yu na bin oldei albumbat mi. Mi sing hepiwan song dumaji mi gudbinji. Mi jidan seifwan garram yu, jis laiga beibiwan jukjuk weya im jidan seifwan andanith langa im mami wing.

⁸Mi holdim yu adbala, en yu bingga kipum mi seifwan.

⁹Detlot hu oldei trai blanga kilim mi ded garra godan langa det pleis weya ola dedwan pipul jidan.

¹⁰Olabat garra gitkil langa wofait, en ola wailwan dog garra dagadagat olabat bodi.

¹¹Dumaji God album det king blanga win, det king garra jidan gudbinjiwan. Detlot hu meigim pramis garram God neim garra preisim im, bat God garra jadimap ola mawus blanga laiyinbala pipul.