Ola Saam 60:2-8

²Yubin meigim dijan kantri sheik nomo lilbit, en yubin bastimap dijan kantri. God, yu meigim dijan kantri jidan gudwan igin.

³Yubin meigim ol yu pipul olabat ardimbat detmatj. Yubin meigim melabat buldanbat ebriweya laiga drangginbala.

⁴Bat yubin gibit woning langa detlot hu weship langa yu blanga sabi, wulijim olabat gin kamat brom det deinja.

⁵Ensim melabat preya en seibum melabat garram yu pawa, wulijim ola pipul hu yu laigim gin jidan seifwan.

⁶God bin tok brom im brabli seikridwan pleis, “Gudbinjiwei ai garra kadimat det taun Shekam, en gibit det kantri Sukait Beli langa main pipul olabat.

⁷Det dubala kantri gulum Giliyad en Manesa blanga main. Det kantri Ifreiyim jidan wulijim main speshalwan het, en det kantri Juda im jidan wulijim main seikridwan stik.

⁸Bat ai garra meigim det kantri Moweb jidan wulijim rabishwan pleis weya dei tjakam dardiwan woda, en ai garra tjakam main but langa det kantri Idam blanga shoum mi bos blanga im. Mi jingat gudbinjiwei, dumaji aibin bidim detlot Filistain pipul.”