Ola Saam 5:4-12

⁴Yu na det God hu heidim nogudbala ting, en nogudbala pipul kaan jidan garram yu.

⁵Praudbala pipul kaan kaman blanga jidan garram yu. Brabliwei yu nomo laigim ola pipul hu dum ola nogudbala ting.

⁶Yu binijimap laiyinbala pipul. Yu heidim detlot hu dalim ola laiyawan wed blanga meigim pipul nogudbinji, en detlot hu oldei medrim pipul, yu heidim detmatj.

⁷Bat dumaji yu laigim mi detmatj, ai gin kaman langa yu Serramoni Pleis. Dumaji mi bradin en rispek langa yu, mi tenim miselp langa yu Seikridwan Pleis en weship yu.

⁸YAWEI, mi garram loda enami. Dalim mi blanga detlot raitwan ting ai garra dum, en lidim mi langa det streitwei blanga go.

⁹Dei oldei tok laiyawan wed. Insaid langa olabat hat dei oldei jinggabat blanga binijimap pipul. Wen dei opinim olabat mawus en tok detlot wed, dei tok trikibalawei wulijim detlot pipul gitkil.

¹⁰Dalim olabat dei gilti. Panishim olabat, God. Deibin meigim plen mijamet blanga ardim najalot pipul. Yu ardim olabat det seimwei na. Jandimwei olabat dumaji deibin nogudbala detmatj. Andimwei olabat dumaji deibin gibit bekboun langa yu.

¹¹Bat ol detlot pipul hu trastim yu blanga kipum olabat seif garra oldei sing langa yu gudbinjiwei. Yu blandim olabat brom olabat enamimob, en olabat garra oldei preisimbat yu.

¹²Yu oldei jidan garram detlot pipul hu jidan raitwei langa yu. Yu blokim ola nogudbala ting brom olabat laiga shild, dumaji yu brabli kainbala langa yu pipul olabat.