Ola Saam 59:10-16

¹⁰Main God, yu oldei laigim mi, en yu garra go lida langa mi, en larram mi luk weya yu bidim main enami olabat hu oldei tok nogudbalawei blanga mi.

¹¹Bat nomo kilim olabat ded, main Bos, bambai main kantrimenmob mait fogedabat ebrijing yubin dum. Yu win oba langa olabat garram yu strongbala pawa, en spredimat olabat ebriweya, dumaji yu na det shild blanga melabat.

¹²Olabat tok brabli nogudbalawei, en detlot nogudwan wed jidan langa olabat mawus. Larram detlot wed dagat olabat, dumaji dei reken miselp detmatj. Dumaji olabat oldei sweya, en oldei dalimbat laiya du,

¹³wal yu gitwail langa olabat en binijimap olabat. Yu binijimap olabat holot na! En bambai na ebribodi oloba langa dijan wel garra sabi God im jidan boswan blanga Isreil.

¹⁴Main enami olabat oldei kambek ebri aftanuntaim, jis laik detlot jigiwan dog weya dei ranabat ebriweya langa taun.

¹⁵Olabat jis laik detlot jigiwan dog weya dei oldei lukaranbat blanga daga, en if dei nomo faidim naf daga dei stat jinginatbat adbala.

¹⁶Bat main God, ai garra singim song blanga yu blanga det strongwan pawa blanga yu. Ebri moning ai garra singim song blanga yu filing blanga laigim olagijawan. Yu oldei jidan main seifwan haus. Wen trabul kaman langa mi ai go langa yu blanga kipum mi seif.