Ola Saam 52:1-9

¹Yu brabli nogudbala men! Wotfo yu tok praudbalawei blanga detlot nogudbala ting yubin dum langa God pipul olabat?

²Yu oldei meigim plen blanga dum nogud ting langa najalot pipul. Yu oldei deigimbat yan weya ardimbat pipul, jis laiga shapwan naif kadim en ardimbat pipul.

³Yu laigim ola brabli nogudbalawei mowa den yu laigim det gudbalawei. En yu laigim det laiyinbalawei mowa den yu laigim det trubalawei.

⁴Yu laiyawan! Yu laigim ardimbat pipul garram yu wed.

⁵Wal God garra meigim yu laif nogudwan olagija. Im garra gajim yu en deigidawei yu brom yu kemp. Im garra binijimap yu.

⁶Ola pipul hu jidan trubalawei langa God garra luk dijan, en olabat garra bradin. Brom deya dei garra laflaf langa yu en dei garra tok,

⁷“Yu luk! Iya na det brabli nogudbala men hu nomo bin kaman langa God blanga jidan seifwan, bat imbin trastimbat ola ebrijing weya imbin abum, en imbin trastimbat ol im nogudbalawei blanga jidan seifwan.”

⁸Bat mi, mi jidan jis laik det olibtri weya grogrobat langa God haus. Mi trastimbat langa God en im filing blanga laigimbat olagijawan.

⁹God, ai garra oldei gibit yu theingks blanga wanim yubin dum. Wen yu pipul olabat majurrumap miselp, ai garra dalimbat olabat, yu na brabli gudwan.