Ola Saam 51:2-12

²Washim mi brabliwei brom ol detlot nogudbala ting. Klinim mi brabliwei.

³Trubala, ai sabi aibin dum rong ting, en mi oldei jinggabat ol detlot nogudbala ting aibin dumbat.

⁴Main God, aibin dum nogudbala ting langa yu. Aibin dum det ting weya yu tok im nomo gudwan. Blanga tharran na, yu rait wen yu tok aibin dum nogud ting, en yu gibit feyago langa mi wen yu panishim mi.

⁵Trubala aibin jidan nogudwan brom det taim wen aibin deya insaid langa main mami binji, en seimwei du aibin jidan nogudwan wen aibin bon.

⁶Ai sabi yu wandim mi blanga jidan brabli trubalawei insaid langa main spirit. Yu titjim mi brabliwei wanim yu wandim mi blanga sabi en dum.

⁷Deigidawei ol main nogudbalawei, en ai garra jidan klin. Washim mi brabli klin, en ai garra jidan klin brom ol main nogudbalawei.

⁸Ai wandim jidan gudbinjiwei igin! Nomeda yubin panishim mi brabliwei, yu meigim mi gudbinji igin!

⁹Jadimap yu ai, wulijim yu kaan luk ol detlot nogudbala ting main, en rabumat ol detlot ting aibin dumbat wen ai nomo bin duwit langa yu.

¹⁰Main God, meigim mi nyu insaid. Meigim mi jinggabat blanga ola gudwan ting.

¹¹Nomo jandimwei mi. Nomo deigidawei yu holi spirit brom mi.

¹²Meigim mi gudbinji laik aibin jidan basdam wen yubin seibum mi. En meigim mi wandi duwit langa yu.