Ola Saam 50:2-14

²Det lait blanga God im shain brom Saiyan, det brabli purdiwan taun, nomo garram enijing rong.

³Det God blanga wi im kaminap, bat nomo kwaitbalawei. Bigiswan wailfaiya weya barnimap ebrijing kaman lida langa im, en garram strongwan win en jigiwan laitining raidaran langa im.

⁴Im jingat langa hebin en dijan wel blanga jidan witnis wen im jadjim im pipul olabat.

⁵Im tok, “Majurrumap main pipul olabat, detlot hu jidan trubalawei langa mi, en hubin meigim strongwan pramis garram mi wen deibin bringim sekrifais ofring langa mi.”

⁶Ebrijing langa hebin tok, “Oni God im jidan jadj, en im oldei dum ebrijing raitwei.”

⁷God im tok, “Main pipul olabat, mi na God. Yumob Isreil pipul, mi na blanga yumob God. Yumob lisin en ai garra tok blanga yumob nogudbalawei.

⁸Ai nomo tok yumob dumbat rong ting wen yumob oldei gibit sekrifais ofring langa mi, en wen yumob oldei bringimap ola ofring langa mi en barnim olabat,

⁹bat ai nomo wandim yumob ofring, ol detlot buligi en nenigout brom yumob fam.

¹⁰Ola enimul langa bush, olabat main, en ola buligi langa ola hil kantri main du.

¹¹Ola wailwan bard blanga main, en ola laibwan ting langa dijan kantri main du.

¹²“If ai bina hanggribala, ai nomo bina askim yumob blanga daga, dumaji dijan wel en ebrijing weya jidan iya, olabat blanga main.

¹³Wen yumob gibit sekrifais ofring langa mi, yumob reken mi dagat det bifpat blanga buligi, o dringgim det blad blanga nenigout? Nomo.

¹⁴Mi na det Boswan God, en ai wandim yumob blanga gibit mi dijan sekrifais ofring na. Ai wandim yumob blanga gibit theingks langa mi, en dum ebrijing yumob bin pramisim langa mi.