Ola Saam 44:2-13

²Yu na bin andimwei ola najalot pipul brom det kantri, en yubin meigim yu ronwan pipul jidan deya na.

³Blanga yu pipul olabat nomo bin fait garram olabat spiya blanga teikoba det kantri. Dei nomo bin win garram olabat ronwan pawa, bat garram yu strongbala pawa yubin album olabat. Dumaji yubin deya garram olabat, yubin shoum olabat haumatj yubin laigim olabat.

⁴Yu na main king en yu main God. Yu na bin album yu pipul win,

⁵en garram yu pawa na melabat oldei bidim ola enami blanga melabat.

⁶Ai nomo trastim main bo en erro, o main bigwan naif blanga seibum mi.

⁷Bat yu na bin seibum melabat brom melabat enami olabat, en yu na bin bidim ol detlot pipul hu nomo bin laigim melabat.

⁸Oni blanga yu na God melabat garra oldei toktokbat, en melabat garra oldei preisim yu neim en gibitbat yu theingks olagijawan.

⁹Bat yubin gibit melabat bekboun na, en yubin larram ola enami kaman en bidim melabat. Yu nomo go garram melabat amimob enimo.

¹⁰Yubin meigim melabat ran brom melabat enami olabat, en deibin deigidawei ola ebrijing blanga melabat.

¹¹Yubin larram melabat gitkil wulijim ship, en yubin jandimwei melabat langa ola difrinwan kantri.

¹²Yubin gibitwei yu ronwan pipul olabat blanga lilwan prais, jis laik deibin tjipwan.

¹³God, ol detlot traib weya nomo weship yu bin luk wanim yubin dum langa melabat, en olabat mokimbat en laflaf langa melabat.