Ola Saam 40:3-16

³Imbin gibit mi nyubala song blanga sing. Ai preisim im garram det song dumaji imbin seibum mi lagijat. Loda pipul garra irrim hau imbin seibum mi garram pawa. Dei garra hatjamp en bradin langa im, en dei garra trastim YAWEI.

⁴Detlot pipul hu trastim langa YAWEI, olabat jidan gudbinji. Olabat nomo jidan praudbala, en olabat nomo bulurrum najalot pipul hu weshipbat ola difrinwan drimin.

⁵YAWEI, main God, yu oldei jinggabat melabat. Yubin dum loda klebabalawan ting blanga melabat, en nobodi iya jidan wulijim yu! Yubin dum detmatj gudbala ting blanga melabat, melabat kaan kaundim olabat!

⁶Pipul bringimap ola enimul en daga blanga yu. Dei bringimap detlot enimul blanga kilim en barnim det sekrifais blanga yu, en dei bringimap det sid daga ofring du. Bat yu nomo wandim detkain ofring. Yu wandim pipul garra gibit miselp langa yu. Ai sabi yu wandim mi blanga irrim en duwit langa yu.

⁷Aibin dalim yu, “God, mi jidan iya. Yu dalim mi wanim blanga dum langa yu buk garram ola lowa.

⁸Mi gudbinji blanga dum wanim yu wandim. Wen ai irrim yu wed ai jinggabat, en im jidan insaid langa mi.”

⁹Wen ola pipul kaman mijamet blanga weship langa yu, ai dalim olabat det gudnyus hau yubin seibum mi. Yu sabi ai nomo wandi stap dalimbat pipul det gudnyus.

¹⁰Ai nomo bin kipum det nyus blanga main ronselp. Aibin dalim olabat blanga yu, “YAWEI, im oldei dum wanim imbin pramisim. Im seibum wi brom olkain nogud ting.” Ai nomo bin jidan kwaitbala blanga det nyus, bat aibin dalim olabat, “YAWEI, im brabli kainbala, en im laigim wi olagijawan, en im oldei dum wanim imbin pramis.” Lagijat na aibin dalim ol detlot pipul.

¹¹YAWEI, nomo stap kain langa mi. Yu kainbala en yu dum wanim yu pramis. Wotjimbat mi en kipum mi seif olagijawan.

¹²Aibin dum detlot nogud ting bifo, en brom detlot ting na mi abumbat detmatj trabul, en mi fil wik, en ai nomo sabi wanim blanga dum. Aibin dum detmatj nogudbala ting ai kaan kaundim olabat. Dei jidan mowa langa ola heya langa main hed, en mi brabli nogudbinji.

¹³YAWEI, yu jidan gudbala langa mi en seibum mi! Album mi kwikbala, YAWEI!

¹⁴Yu bidim detlot enami hu wandi kilim mi. Yu meigim olabat nomo sabi wanim olabat jinggabat. Meigim detlot pipul hu wandi ardim mi gowei sheimwei.

¹⁵Bidim ol detlot pipul hubin mokimbat mi, wulijim dei garra hatjamp en sheim miselp brabliwei.

¹⁶Bat ol detlot pipul hu kaman langa yu, garra jidan gudbinji garram yu. Melabat laigim yu, dumaji yubin seibum melabat. Wal melabat garra oldei tok, “Preisim YAWEI det haiwan God!”