Ola Saam 38:7-20

⁷Mi barnbarn detmatj en mi gulijap dai.

⁸Mi nokap na en ai kaan dum enijing. Mi jingat dumaji mi ardimbat detmatj en mi fil nogudbinji.

⁹YAWEI, yu sabi wanim mi wandim brabli. Yu lisinbat langa mi wen mi jingat langa yu.

¹⁰Main hat im pamping nomo lilbit. Ai nomo strongbala enimo. En main dubala ai nomo luk gudwei na.

¹¹Ol main fren en detlot pipul hu jidan wansaid langa mi kaan kaman gulijap langa mi, dumaji ai garram loda sowa, en ol main femili kipawei brom mi du.

¹²Detlot pipul hu wandim kilim mi ded, olabat pudumbat ola trep blanga mi. En detlot pipul hu wandim kilim mi, olabat toktok blanga meigim ebrijing nogud blanga mi. Olabat kaan stap toktokbat blanga dum nogudbala ting langa mi.

¹³Mi jis laik defwan en kaan irrim enijing, en jis laik ai nomo garram mawus en kaan tok langa enibodi.

¹⁴Mi jis laik detlot hu nomo ensim dumaji dei kaan lisin.

¹⁵Bat mi trastim yu, YAWEI. Yu na main bos en main God, en yu na garra ensim mi.

¹⁶Nomo larram ol main enami rabishim mi. Nomo larram olabat tok jigibalawei wen ai stat dumbat nogudbala ting.

¹⁷Im jis laik mi nili buldan en mi ardimbat olataim.

¹⁸Ai dalim yu, “Mi sori blanga ol main nogudbalawei.” Dei meigim mi wori detmatj.

¹⁹Ol main enami garram gudwan bodi en dei jidan strongbala. Sambala pipul nomo laigim mi, en dei nomo garram eni risan.

²⁰Detlot pipul hu peiyimbek mi nogudwei blanga gudbala ting mi dum, olabat main enami.