Ola Saam 34:4-17

⁴Aibin lukaranbat blanga YAWEI blanga album mi, en imbin album mi. Imbin seibum mi brom detlot ting weya bin bradinim mi.

⁵Yu trastim langa YAWEI du en jidan gudbinji. Wen yu go langa im, yu enami olabat kaan bidim yu en meigim yu sheim.

⁶Wen aibin abum trabul, en ai nomo bin sabi wanim mowa blanga dum, aibin jingat langa YAWEI. Imbin irrim mi, en imbin seibum mi brom ol detlot trabul.

⁷Det einjul blanga YAWEI wotjimbat detlot pipul hu abum rispek langa YAWEI. Im seibum olabat brom ola trabul.

⁸Yumob kaman langa YAWEI ol yumob pipul blanga im, en faindat im brabli switwan. Wen pipul askim im blanga lukaftum olabat, dei jidan gudbinji.

⁹Ol yumob pipul blanga YAWEI, yumob garra rispek langa im. Wen enibodi rispek YAWEI, dei kaan jidan nomo garram enijing.

¹⁰Wen det laiyan go hanting, im jidan hanggri wen im nomo faindim eni daga, bat wen wi duwit langa YAWEI, im kaan libum wi nomo garram eni gud ting.

¹¹Yumob pipul hu kaman langa mi blanga len, yumob irrim mi. Ai garra titjim yumob det raitwei blanga jidan wen yumob rispek YAWEI.

¹²If yumob wandi abum gudwan laif, en if yumob wandi kipgon jidanbat laibala gudbinjiwei,

¹³wal yumob kaan tokabat pipul nogudwei en dalimbat laiya!

¹⁴Yumob tenim miselp brom dumbat ola nogud ting, en yumob dum ola gudwan ting. Yumob jidan hepiwei, en yumob trai kipgon jidanbat lagijat olataim.

¹⁵YAWEI oldei lukaftumbat detlot pipul hu bulurrum im. En wen dei jingat langa im, im oldei irrim.

¹⁶Bat YAWEI im wail langa detlot pipul hu oldei dumbat nogud ting. Im garra binijimap olabat, en pipul garra fogedabat olabat olagija.

¹⁷Bat detlot pipul hu bulurrum YAWEI brabliwei, wen olabat abum trabul en jingat langa im, im seibum olabat brom ol detlot trabul.