Ola Saam 33:3-14

³Sing nyuwan song langa im. Plei det gita gudbalawei en jingat adbala gudbinjiwei.

⁴Ola wed blanga YAWEI im trubalawan, en yu gin trastim ebrijing im dum blanga album yu.

⁵YAWEI laigim wanim gudwan en wanim feyagowan. Im garram det olagijawan filing blanga laigim ebrijing langa dijan wel.

⁶YAWEI bin meigim ebrijing langa hebin garram im wed. Imbin jis tok en det san, mun, en ola sta bin kamat.

⁷Imbin hipimap ola solwoda langa wan pleis. Imbin lokimap ola woda raitdan andanith langa det solwoda langa im ron stowahaus.

⁸Ebribodi hu jidan langa dijan wel garra weship langa YAWEI. Shoum rispek langa im ol yumob pipul hu jidan ebriweya langa dijan wel.

⁹Wen imbin tok dijan wel bin kamat. Wen imbin gibit oda ebrijing bin kamat.

¹⁰Langa detlot kantri weya pipul nomo bulurrum YAWEI, im nomo larram eni nogudbala plen hepin.

¹¹Bat ebrijing weya imbin plenim oldei hepin, en ebrijing blanga im jidan olagijawan du.

¹²Ola pipul langa det kantri weya weship langa YAWEI det trubala God, jidan gudbinjiwei, detlot pipul na weya imbin pikimat blanga imselp, jidan gudbinjiwei.

¹³YAWEI im lukdan brom hebin en im luk ola pipul.

¹⁴Brom weya im jidan bos, im lukdan langa ebribodi hu jidan langa dijan wel.