Ola Saam 31:5-14

⁵YAWEI, langa yu bingga na ai libum main spirit. Yu garra seibum mi, YAWEI. Yu na det brabli trubalawan God.

⁶Yu nomo laigim ol detlot hu weship ola drimin sheip, bat mi oldei trastim yu.

⁷Ai garra jidan brabli gudbinji en preisim yu dumaji yu garram olagijawan filing blanga laigimbat mi. Yu sabi main pein en ol main trabul.

⁸Yu nomo bin larram main enami olabat deigim mi prisana. Yubin kipum mi fri en seifwan.

⁹YAWEI, yu jidan kainbala langa mi dumaji mi brabli nogudbinji. Aibin kraikrai detmatj en mi brabli wikwan.

¹⁰Mi wikwan dumaji mi oldei jidan sedwan. Aibin kraikrai detmatj ai kaan jidan longtaim na. Ol main trabul bin meigim mi wikwan. Main bodi im brabli wikwan en ai kaan dum enijing mowa.

¹¹Main enami olabat tok langa mi, “Yu najing!” Ola pipul weya jidan wansaid langa mi reken mi rabishwan du. Main frenmob bradin blanga kaman gulijap langa mi. Wen olabat luk mi eniweya dei gibit mi bekboun.

¹²Mi jis laiga breikinwan kap weya dei tjakidawei. Olabat nomo jinggabat mi. Im jis laik mi dedbala.

¹³Main enami olabat majurrumap miselp en tok blanga kilim mi. Mi brabli bradin. Olabat meigimbat plen blanga kilim mi ded.

¹⁴YAWEI, ai trastim langa yu. Yu na main God.