Ola Saam 31:14-23

¹⁴YAWEI, ai trastim langa yu. Yu na main God.

¹⁵Yu holdim main laif langa yu bingga. Seibum mi brom ol main enami, en brom detlot hu ranimap mi.

¹⁶Mi na blanga yu wekinmen. Yu luk langa mi. Seibum mi dumaji yu laigim mi olagijawan.

¹⁷YAWEI, mi jingat langa yu. Yu ensim mi en nomo meigim mi sheim. Yu meigim main enami olabat sheim, en binijimap olabat.

¹⁸Jadimap olabat mawus weya dei oldei dalimbat laiya, en wen dei oldei reken miselp en tok nogudwei blanga detlot pipul hu oldei jidan raitwei.

¹⁹Yu brabli gudwan en yu garram ola gudbala ting blanga detlot hu rispek langa yu. En detlot hu trastimbat yu, yu oldei lukaftumbat olabat. Pipul ebriweya luk wanim yu dumbat.

²⁰Yu oldei maindimbat yu pipul olabat wen najalot pipul meigimbat plen blanga dum nogudbala ting langa olabat. Yu nomo larram eni nogudbala wed kaman en ardim langa olabat.

²¹Preisim YAWEI det trubala God. Imbin laigim mi detmatj en imbin shoum mi tharran na wen main enami olabat bin olaran en fait langa melabat langa det bigbala taun weya aibin jidan.

²²Aibin bradin nomo lilbit, en aibin reken imbin andimwei mi. Bat imbin irrim mi en album mi wen aibin jingat langa im.

²³Kipgon jidan trubala langa YAWEI ol yumob pipul hu oldei trastimbat im. YAWEI oldei lukaftumbat ol im pipul, bat im panishim detlot pipul hu laigimbat miselp.